«BPS-Śbierbank» adkazaŭ na pretenzii žonki pamierłaha kiroŭcy: «Dapamoha budzie. Ale my nie zhodny ź interpretacyjaj»
«Naša Niva» apisvała trahičnuju historyju, jakaja adbyłasia praz karanavirus u centralnym ofisie BPS-Śbierbanka.
Čytajcie: Karanavirus u BPS-Śbierbanku: 51-hadovy kiroŭca pamior, top-mieniedžary ŭ balnicy
Paśla śmierci 51-hadovaha Eduarda Cichamirava jahonyja svajaki zajaŭlali ab namiery sudzicca z bankam.
Na momant vychadu publikacyi apieratyŭnaha kamientara ad banka nie było, adnak siońnia pres-sakratar «BPS-Śbierbanka» Arsień Lipski adkazaŭ na pytańni «Našaj Nivy».
«Naša Niva»: Ci adpaviadajuć rečaisnaści słovy svajakoŭ ab tym, što niejki supracoŭnik banka — nulavy pacyjent — paśla viartańnia z-za miažy (a kankretna — ź Ispanii, krainy z vysokaj ryzykaj), byŭ prateściravany na karonavirus, ale chadziŭ na rabotu da taho, jak pryjšoŭ stanoŭčy vynik?
Arsień Lipski: Heta niapraŭda, my takuju traktoŭku admaŭlajem całkam, nie razumieju, ź jakich čutak heta ŭziałosia, što jany tak heta razumiejuć.
Pieršy stanoŭčy test u našaha supracoŭnika, pra jaki nam stała viadoma, pryjšoŭ 27 sakavika. Nivodzin z 12 paćvierdžanych supracoŭnikaŭ u lutym i sakaviku nie byŭ u Ispanii.
Da taho ž u nas było pryniata rasparadžeńnie, zhodna ź jakim usie, chto viartajecca z-za miažy, iduć na musovuju samaizalacyju na 14 sutak, tak było i asabista sa mnoj u pačatku sakavika.
«Naša Niva»: Vy skazali, što pieršy vynik testu pryjšoŭ 27 sakavika. A kali jon byŭ zrobleny?
Arsień Lipski: Takoj infarmacyi u mianie niama. My ž nie viedali, ź jakim dyjahnazam naš supracoŭnik sychodzić na balničny.
Ale pieršuju supracoŭnicu, u jakoj byŭ vyjaŭleny karanavirus, špitalizavali 18 sakavika. Pieršy vynik testu pryjšoŭ 27 sakavika.
Jana była za miažoj u pieršaj pałovie lutaha, ale nie ŭ Jeŭropie.
Mahčyma, svajaki Eduarda i mohuć mieć na ŭvazie hetaha čałavieka, ale času miž viartańniem i špitalizacyjaj prajšło šmat, my nie bačym tut suviazi.
Da taho ž, u kantaktaŭ pieršaha koła hetaj žančyny, u tym liku tych, chto pracavaŭ ź joj u kabiniecie, niama nivodnaha stanoŭčaha testa.
«Naša Niva»: Jak bank padtrymaje siamju?
Arsień Lipski: U nas jość kalektyŭnaja damova, usie supracoŭniki — udzielniki. Jość punkty, jakija apisvajuć situacyju, jakaja zdaryłasia. U damovie zafiksavana padtrymka svajakam, apisana bazavaja padtrymka, jakaja akazvajecca ŭ musovym paradku — kaniečnie, kampiensacyja vydatkaŭ na pachavańnie.
Aproč hetaha, my viadziem razmovu ab materyjalnaj padtrymcy siamji. My źviazvalisia sa svajakami, ale jaho hramadzianskaja žonka pa pracedury nie ličycca svajakom, jany ž nie raśpisany. Tamu havorać nie ź joj, a z bratam.
Jość i inšyja mahčymaści, u ramkach jakich vypłačvajecca da pałovy hadavoha akładu supracoŭnika, jaki syšoŭ z žyćcia. Rašeńnie ab takoj padtrymcy prymajecca kalehijalnym rašeńniem kiraŭnictva banka. Vialikaja dola vierahodnaści, što hetaja padtrymka budzie akazanaja.
Chaču padkreślić, što my ni ŭ jakim razie nie ŭstupajem ź siamjoj u palemiku. My vykazvajem hłybokija spačuvańni rodnym i blizkim spadara Eduarda.
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny41
Kamientary