Nastupnaja revalucyja ŭ infarmatycy — niejronnyja sietki. Kampjutar budzie nie prahramavacca, a vučycca
Našyja mazhi pracujuć dziakujučy śpiecyjalnym kletkam — niejronam, jakija ruchajucca, pieradajučy elektrachimičnyja impulsy roznym orhanam i častkam cieła. Dla pracy štučnaha intelektu patrebnyja peŭnyja štučnyja mazhi z štučnymi niejronami. Tak źjavilisia štučnyja niejronnyja sietki, jakija pracujuć dziakujučy ŭzajemadziejańniu štučnych niejronaŭ.
Niejronnyja sietki ŭ štučnym intelekcie — heta sproščanyja madeli bijałahičnych niejronavych sietak. Jany ŭjaŭlajuć saboj sistemu złučanych prostych pracesaraŭ (štučnych niejronaŭ), jakija ŭzajemadziejničajuć pamiž saboj.
Niejronnaja sietka adroźnivajecca ad zvyčajnych ałharytmaŭ tym, što jana nie prahramujecca ŭ zvykłym sensie hetaha słova, a vučycca. Mahčymaść vučycca — adna z hałoŭnych pieravah niejronnych sietak pierad tradycyjnymi ałharytmami.
U pracesie navučańnia niejronnaja sietka zdolnaja vyjaŭlać składanyja zaležnaści pamiž uvachodnymi i vychodnymi danymi. Technična navučańnie zaklučajecca ŭ znachodžańni suviaziaŭ pamiž niejronami.
Štučny niejron robić ź niekalkich uvachodnych paramietraŭ adzin vychodny, vynikovy.
Ale što značyć «niejrony mohuć vučycca»? Navučańnie niejronnaje sietki (jak naturalnaj, tak i štučnaj), u pieršuju čarhu, zaklučajecca ŭ źmienie «siły» suviaziaŭ pamiž niejronami, što adbyvajecca pry nieadnarazovym prajhravańni adnych i tych ža apieracyj.
Razhledzim viadomy prykład z žyćcia. U kłasičnym ekśpierymiencie Paŭłava kožny raz niepasredna pierad karmleńniem sabaki hučaŭ zvanočak.
Sabaka dosyć chutka navučyŭsia źviazvać huk zvanočka z pryjomam ježy. Heta źjaviłasia vynikam taho, što suviazi pamiž učastkami hałaŭnoha mozhu, adkaznymi za słych i ślinnyja załozy, uzmacnilisia. Tamu ŭ kožnym nastupnym razie ŭzbudžeńnie niejronnaje sietki hukam zvanka stała pryvodzić da macniejšaha ślinavydzialeńnia u sabaki.
Hetaksama i štučnyja niejronnyja sietki mohuć vučycca z dapamohaj adpaviednych składanych pryjomaŭ.
Naprykład, pry raspracoŭcy mabilnaha dadatku, jaki zdolny vyrazać fon z «sełfi», pakidajučy tolki tvar, niejronnaj sietcy dajuć šmat prykładaŭ «raspaznavanych vobrazaŭ» — miljony roznych fota, pakul jana nie navučycca dakładna adroźnivać na advolnym fotazdymku čałavieka i fon.
Paśla navučańnia atrymlivajecca hatovaja prahrama, jakaja zdolnaja chutka vyrašać kankretnuju zadaču — vyrazać fon z fatahrafii.
Darečy, mienavita tak navučajecca pošuk čałavieka pa tvary ŭ fotaaparatach, smartfonach, kampjutarach.
Na siońniašni dzień niejronnyja sietki źjaŭlajucca adnym z samych pryjarytetnych napramkaŭ daśledavańniaŭ u vobłaści štučnaha intelektu i adyhryvajuć vialikuju rolu va ŭstalavańni bolš ciesnaha ŭzajemadziejańnia čałavieka i techniki. A hałoŭnaj zadačaj na siońnia źjaŭlajecca pošuk novych, najbolš efiektyŭnych sposabaŭ navučańnia niejronnych sietak.
* * *
Hety artykuł — praciah sieryi artykułaŭ, u jakich my raspaviadajem pra samyja novyja technałohii. Naša meta — dapamahčy vam nie zabłytacca ŭ sučasnaj terminałohii, jakaja ŭsio čaściej užyvajecca ŭ ŚMI, u tym liku i na staronkach «Našaj Nivy».
Kamientary