«Людзі дамовіліся ў адзін час выйсці ў лакальныя ўчасткі і біць усіх актывістаў». Ігар Лосік расказаў пра бунт у Наваполацкай калоніі
Былы палітвязень і блогер Ігар Лосік, які адбываў тэрмін у Наваполацкай калоніі і выйшаў на волю 11 верасня 2025 года, расказаў у сваіх сацсетках пра бунт, што адбыўся ў верасні 2025 года ў калоніі.
«Пачну з перадгісторыі. У лагерах ёсць некалькі тыпаў зняволеных. Гэта блатныя, актывісты, мужыкі і нізкі статус. Блатных дагэтуль амаль нідзе не засталося, тым больш на лагерах для першаходаў. «Актывісты» — гэта зняволеныя, якія супрацоўнічаюць з адміністрацыяй калоніі за розныя плюшкі. Пра актывістаў якраз у тэму выйшаў артыкул на «Люстэрку».
Дык вось, лагер у Наваполацку вельмі спецыфічны і жорсткі асабліва пры былым начальніку Пальчыку (аказваецца ён з Баранавічаў з суседняга са мной пад'езда, вось такая іронія).
Кожную раніцу ў штабе там стаяла чарга з даносчыкаў, якія дзяліліся з операмі чуткамі і скаргамі ў асноўным на палітычных, але і не толькі.
Пальчык выбудаваў сваю сістэму з актывістаў, усё працавала як гадзіннік. Але пасля таго як Пальчык настолькі загуляўся ў садызм, што пра яго нават напісалі ў «СБ» і саслалі кіраваць арыштным домам на 5 камер у Віцебскім СІЗА, памяняўся начальнік. Прыйшоў Машадзіеў і пачаў ламаць гэтую сістэму са стукачоў, заўгасаў і ўсіх «казлоў» пад сябе.
Напружанне паміж ўсёдазволенасцю актывістаў і такой атмасферай пры сталым зацісканні гаек расло і ў выніку як гэта заўсёды бывае, калі спружыну вельмі моцна сціскаць, то аднойчы яна выпрастаецца. Гэта і адбылося восенню 2025 года.
Адзін з самых ненавісных актывістаў у Наваполацку быў зняволены па прозвішчы Іваноў. І вось у дзень ікс яго аблілі мачой. Адпаведна, гэта аўтаматычна даўно складзеная сістэма пераводу ў «нізкі статус», як кажуць на зоне «ў пеўні». Адпаведна, з ім нельга мець ніякіх спраў, нельга дакранацца, нічога з рук у яго браць таксама нельга. Ну і вядома сядзець за адным сталом.
Адміністрацыя калоніі нічога не зрабіла, у нізкі статус яго не вызначылі, бо гэта быў свой актывіст і на яго былі іншыя планы. Але гэта паслужыла трыгерам. У сталовай пачалася буча, зняволеныя пачалі крычаць, што не будуць сядзець з ім за адным сталом, адмаўляліся ад ежы. З гэтага ўсё і пачалося.
Што зрабіла адміністрацыя? Яны Іванова проста паклалі ў санчастку. Ізалявалі ад граху далей, на Наваполацку гэта ўжо ўвайшло ў традыцыю. Ну гэтым разам зняволеныя сказалі: «Ніфіга. Ён павінен быць у нізкім статусе». А Іванова ціха вывезлі ў шпіталь на «тройку» ў Віцебск.
І тут пацаны пачалі выстаўляць патрабаванні датычна ўсіх астатніх актывістаў. Бо ўсіх дасталі.
Напрыклад, быў там такі Карлаў, унук былога рэктара Віцебскага каледжа, я з ім сядзеў 4 месяцы ў ПКТ. Яго баяліся нават свае ж «казлы» і на некаторых атрадах на яго ставілі пікеты як і на мянтоў, калі ён з'яўляўся на лакальнай зоне.
І тут пачалася дзвіжуха. Людзі дамовіліся ў адзін час выйсці ў лакальныя ўчасткі і біць усіх актывістаў. Карлаў, Каламін, Асіпенка, загадчык гаспадаркі некаторых атрадаў (дакладна сёмага і восьмага). Пабілі загадчыкаў гаспадаркі.
Частка людзей пабегла ў атрады і паразбівалі тэлевізары. Ёсць інфармацыя, што нават разбілі некалькі відэакамер.
Пасля гэтай гойды прыехала вялікая камісія з Дэпартмента выканання пакаранняў нібыта нават з самім начальнікам, даведваліся якія патрабаванні і чаму так здарылася. Заходзілі ў кожную камеру ШІЗА (чаго ніколі не было), з некаторымі ўдзельнікамі гаварылі да шасці гадзін, чым лагер жыве і што за бздура там адбываецца. А яшчэ. Пад дахам (у ШІЗА) таксама быў бунт, там кожную раніцу табе пад ногі выліваюць некалькі літраў хлёркі, так гэтую хлёрку збіралі і вылівалі на радыёкропкі з якіх па 16 гадзін напралёт гучалі па коле некалькі лекцый (я пра гэты метад катаванняў таксама пісаў).
Пасля камісіі ў ШІЗА ўпершыню зачынілі вокны, якія былі адкрыты і зімой і летам заўсёды, каб у камеры было пастаянна холадна і людзі з’язджалі з глузду ад холаду.
Але ў лагер яшчэ і прыязджалі «касманаўты», заслалі ўсіх самых актыўных, пагрузілі ў мікрааўтобусы і развезлі па іншых зонах. Далі ў выніку па тры гады турэмнага рэжыму, а таму каго прызналі важаком, накшталт як раскруцілі па 411‑м артыкуле і дадалі тэрмін. І пасля гэтага як мінімум намеснік РАР Журко быў пераведзены ў СІЗА Калядзічаў».
Цяпер чытаюць
Мама Бажэны Ярэміч, якая рыхтуе прыгажунь для Лукашэнкі, купіла элітны катэдж коштам $837 тысяч24
Каментары
Что касается изьития активистов - такого вообще не было ни разу. Избили как то 3 активистов за конкретные их проделки, и тех кто это их избил жесточайше наказали, раскрутили по 411 ст и добавили сроков.
По поводу того что бы кто то где то бил камеры - не было такого никогда. Но телевизоры один осуждённый действительно разбиля у него ходу крыша съехала и он разбил несколько телевизоров, за что его также жёстко наказали, раскрутили по 411 ст +возможно по 410-ой.
А что касается Лоаикая то он сидел всё время безвылазно у пкт и шизо, потому не знал лично что против у колонии я знал лишь слухи. А сейчас наговорил 20% правды и 80% не реальных домыслов.