Гучна анансаваны Рыжанковым баскетбольны клуб «Шахцёр» збанкрутаваў праз два гады пасля заснавання
Салігорскі баскетбольны клуб «Шахцёр» ў фармаце 3x3 ствараўся пры падтрымцы «Беларуськалію» і падаваўся як прарыў для беларускага баскетбола: база для нацыянальнай зборнай 3x3, заслужаны трэнер з Расіі, удзел у расійскай лізе. Вынік, аднак, бязрадасны — нават не зразумела, ці разлічыліся з трэнерам.
Як стала вядома «Нашай Ніве», учора, 24 чэрвеня, у Эканамічным судзе Мінскай вобласці ў спрошчаным парадку быў прызнаны банкрутам баскетбольны клуб «Шахцёр».
Даўгі клуба трохі больш чым мільён рублёў, а актываў засталося ўсяго на 20 тысяч.
Пры гэтым пачыналася ўсё пафасна — «Шахцёр» прэзентавалі як вітрыну мужчынскага баскетбола ў Беларусі.
Клуб быў заснаваны ў лістападзе 2023-га. Максім Рыжанкоў — тады першы намеснік кіраўніка адміністрацыі Лукашэнкі і адначасова старшыня баскетбольнай федэрацыі — называў гэта важным крокам у гісторыі беларускага баскетбола і сцвярджаў, што менавіта ў Салігорску створаныя «найлепшыя ўмовы» для падрыхтоўкі зборнай.
Пад праект запрасілі заслужанага трэнера Расіі Уладзіміра Агабаб'яна — таго самага, з якім расійская зборная за два гады да таго заваявала срэбра Алімпіяды ў Токіа.
Агабабьян захапляўся базай: маўляў, такіх умоў для трэніровак няма нават у многіх расійскіх каманд.
«Шахцёр» стаў першай замежнай камандай у чэмпіянаце Расіі па баскетболе 3х3. З найбольшых поспехаў: выйграны адкрыты чэмпіянат Санкт-Пецярбурга.
Але дружыны класічнага баскетбола на базе каманды 3х3 так і не з'явілася, а цяпер перастае існаваць і гэта каманда.
Афіцыйных тлумачэнняў адносна прычын ліквідацыі клуба пакуль не давалася.
Цяпер чытаюць
Пальчыс заявіў, што гэта ён каардынаваў пратэсты 2020 года з Мінска і пісаў планы першых маршаў71
Пальчыс заявіў, што гэта ён каардынаваў пратэсты 2020 года з Мінска і пісаў планы першых маршаў
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх2121
Каментары