Аргенцінскі горад «на краі свету» адмаўляе, што з’яўляецца крыніцай хантавіруса
Ушуая, самы паўднёвы горад Аргенціны, карыстаецца рэпутацыяй «краю свету» і брамы для экспедыцый у Антарктыду. Аднак у апошнія дні горад сутыкнуўся з іншага кшталту розгаласам: здагадкай, што менавіта ён можа быць нулявым пунктам успышкі хантавіруса на галандскім судне MV Hondius.
Круізны лайнер цяпер стаіць на якары на іспанскіх Канарскіх астравах, а пасажыры былі эвакуяваныя і адпраўленыя дадому самалётамі. Падарожжа MV Hondius пачалося 1 красавіка каля 10 тысяч кіламетраў ад Ушуаі, што ў правінцыі Вогненная Зямля. На борце знаходзіліся 114 пасажыраў і 61 член экіпажа з 22 краін.
Хоць лічыцца, што вірус трапіў на борт менавіта там, яго дакладная крыніца застаецца па-ранейшаму невядомай, піша BBC. Адна з тэорый сведчыць, што пасажыр мог заразіцца на сметніку на ўскраіне Ушуаі, дзе турысты часта назіраюць за птушкамі і дзе адходы прыцягваюць грызуноў.
Аднак мясцовыя ўлады не прынялі гэтую версію. «На Вогненнай Зямлі за ўсю гісторыю ў нас не было ніводнага выпадку хантавіруса», — заявіў Хуан Факунда Петрына, галоўны эпідэміёлаг правінцыі. Ён падкрэсліў, што эндэмічная зона віруса знаходзіцца больш чым за 1500 км на поўнач.
«Па-першае, у нас няма падвіду мышы даўгахвостай [якая пераносіць хваробу], і мы не маем тыя ж кліматычныя ўмовы, што і паўночная Патагонія — ні ў плане вільготнасці, ні ў плане тэмпературы — якія б спрыялі яго развіццю, — сказаў ён. — А калі б грызуны пачалі перамяшчацца — паколькі яны не паважаюць геаграфічных межаў — варта памятаць, што мы з’яўляемся востравам».
Для правінцыі гэта пытанне не толькі навукі, але і эканомікі. Турызм — істотная крыніца даходу, і больш за 95% суднаў, што ідуць у Антарктыду, выходзяць менавіта з гэтага порта.
Пакуль афіцыйных адмен круізаў няма, і жыццё ў порце ідзе сваім парадкам.
Органы аховы здароўя ўсё яшчэ спрабуюць вызначыць, дзе адбылося заражэнне. Яны мяркуюць, што пара нідэрландцаў, што заразіліся вірусам і памерлі, былі, імаверна, нулявым пацыентам.
Чыноўнікі аднаўляюць іх маршрут праз Аргенціну, Чылі і Уругвай перад пасадкай на карабель ва Ушуаі.
Цяпер чытаюць
У «айці-вёсцы» пад Мінскам прадалі асабняк за 3,6 млн даляраў. Гэта самы дарагі дом у краіне ў красавіку2
Каментары