Прэзідэнт ЗША Дональд Трамп заявіў у панядзелак, што канадская кампанія Bombardier не зможа прадаваць свае самалёты ў ЗША, калі не перанясе туды вытворчасць, піша Бі-бі-сі.
«Больш ніякіх продажаў Bombardier у Злучаных Штатах! — напісаў Трамп у сацыяльнай сетцы Truth Social. — Калі яны хочуць атрымаць доступ да нашага рынку, яны павінны вырабляць тут і перастаць ставіцца да Амерыкі як да «скарбонкі»».
Гэтая заява прагучала на фоне абвастрэння гандлёвай вайны паміж дзвюма суседнімі краінамі і ўсяго за некалькі гадзін да запланаванага ўвядзення Канадай адказных пошлін на амерыканскія тавары на суму 20 млрд даляраў.
Незразумела, якім менавіта чынам Трамп мае намер забараніць Bombardier весці бізнэс у ЗША.
Белы дом таксама не адказаў на пытанне, якія крокі могуць быць зробленыя, каб забараніць пастаўкі самалётаў, ухваленыя Федэральным упраўленнем грамадзянскай авіяцыі ЗША, адзначае Reuters.
Кампанія, якая базуецца ў Манрэалі і спецыялізуецца на вытворчасці бізнес-джэтаў, ужо мае завод у амерыканскім штаце Канзас, дзе вырабляюцца ваенныя самалёты спецыяльнага прызначэння. На прадпрыемстве працуюць 3,5 тысячы амерыканцаў.
Згодна з інфармацыяй на сайце кампаніі, самалёты Bombardier вырабляюцца на прадпрыемствах у Канадзе, ЗША і Мексіцы ў адпаведнасці з патрабаваннямі Паўночнаамерыканскага пагаднення аб свабодным гандлі, якое ўступіла ў сілу ў 1994 годзе.
Bombardier — адна з найбуйнейшых кампаній Канады і адзін з найбуйнейшых працадаўцаў у вытворчым сектары правінцыі Квебек.
Міністр эканомікі Квебека Крысцін Фрэшэт напісала ў сацыяльнай сетцы X, што кампанія з’яўляецца «прадметам гонару» правінцыі і «флагманам эканомікі». Паводле яе слоў, яна звязалася з выканаўчым дырэктарам Bombardier Эрыкам Мартэлем і прапанавала поўную падтрымку з боку ўрада.
«Я не буду адказваць на правакацыю правакацыяй, — пракаментавала яна заяву Трампа. — Квебек не дазволіць нікому дыктаваць, дзе нашы кампаніі павінны весці вытворчасць, каб атрымаць доступ да рынку».
Гандлёвыя перамовы паміж Канадай і ЗША зноў рэзка пагоршыліся ў канцы жніўня пасля таго, як Канада выйшла з перамоваў аб гандлёвым пагадненні, пасля чаго ЗША ўвялі новыя 50‑працэнтныя пошліны на шэраг канадскіх тавараў.
Прэм’ер-міністр Марк Карні абвінавачваў адміністрацыю Трампа ў выстаўленні ў апошні момант умоў, якія ён называў несправядлівымі і эканамічна неабгрунтаванымі. Вашынгтон, у сваю чаргу, сцвярджаў, што Канада адмовілася ад падпісання пагаднення па палітычных прычынах — праз непапулярнасць Трампа ў Канадзе. Сам Карні гэта адмаўляе.
Цяпер чытаюць
Стала вядомае імя другой беларускі, якая згінула пад селем у Непале. Гэта 24‑гадовая Ірына з журфака БДУ5
Стала вядомае імя другой беларускі, якая згінула пад селем у Непале. Гэта 24‑гадовая Ірына з журфака БДУ
Электронную «Беларускую энцыклапедыю», створаную як прастору «верагодных ведаў пра Беларусь», ціха ліквідавалі разам з рэдакцыяй. Купу артыкулаў перадалі Гігіну66
Каментары