Tramp pahražaje zabaranić prodaž kanadskich samalotaŭ Bombardier u ZŠA

«Bolš nijakich prodažaŭ Bombardier u Złučanych Štatach! — napisaŭ Tramp u sacyjalnaj sietcy Truth Social. — Kali jany chočuć atrymać dostup da našaha rynku, jany pavinny vyrablać tut i pierastać stavicca da Amieryki jak da «skarbonki»».

Hetaja zajava prahučała na fonie abvastreńnia handlovaj vajny pamiž dźviuma susiednimi krainami i ŭsiaho za niekalki hadzin da zapłanavanaha ŭviadzieńnia Kanadaj adkaznych pošlin na amierykanskija tavary na sumu 20 młrd dalaraŭ.

Niezrazumieła, jakim mienavita čynam Tramp maje namier zabaranić Bombardier vieści biznes u ZŠA.

Bieły dom taksama nie adkazaŭ na pytańnie, jakija kroki mohuć być zroblenyja, kab zabaranić pastaŭki samalotaŭ, uchvalenyja Fiederalnym upraŭleńniem hramadzianskaj avijacyi ZŠA, adznačaje Reuters.

Kampanija, jakaja bazujecca ŭ Manreali i śpiecyjalizujecca na vytvorčaści biźnies-džetaŭ, užo maje zavod u amierykanskim štacie Kanzas, dzie vyrablajucca vajennyja samaloty śpiecyjalnaha pryznačeńnia. Na pradpryjemstvie pracujuć 3,5 tysiačy amierykancaŭ.

Zhodna ź infarmacyjaj na sajcie kampanii, samaloty Bombardier vyrablajucca na pradpryjemstvach u Kanadzie, ZŠA i Mieksicy ŭ adpaviednaści z patrabavańniami Paŭnočnaamierykanskaha pahadnieńnia ab svabodnym handli, jakoje ŭstupiła ŭ siłu ŭ 1994 hodzie.

Bombardier — adna z najbujniejšych kampanij Kanady i adzin z najbujniejšych pracadaŭcaŭ u vytvorčym siektary pravincyi Kviebiek.

Ministr ekanomiki Kviebieka Kryścin Frešet napisała ŭ sacyjalnaj sietcy X, što kampanija źjaŭlajecca «pradmietam honaru» pravincyi i «fłahmanam ekanomiki». Pavodle jaje słoŭ, jana źviazałasia z vykanaŭčym dyrektaram Bombardier Erykam Martelem i prapanavała poŭnuju padtrymku z boku ŭrada.

«Ja nie budu adkazvać na pravakacyju pravakacyjaj, — prakamientavała jana zajavu Trampa. — Kviebiek nie dazvolić nikomu dyktavać, dzie našy kampanii pavinny vieści vytvorčaść, kab atrymać dostup da rynku».

Handlovyja pieramovy pamiž Kanadaj i ZŠA znoŭ rezka pahoršylisia ŭ kancy žniŭnia paśla taho, jak Kanada vyjšła ź pieramovaŭ ab handlovym pahadnieńni, paśla čaho ZŠA ŭviali novyja 50‑pracentnyja pošliny na šerah kanadskich tavaraŭ.

Premjer-ministr Mark Karni abvinavačvaŭ administracyju Trampa ŭ vystaŭleńni ŭ apošni momant umoŭ, jakija jon nazyvaŭ niespraviadlivymi i ekanamična nieabhruntavanymi. Vašynhton, u svaju čarhu, śćviardžaŭ, što Kanada admoviłasia ad padpisańnia pahadnieńnia pa palityčnych pryčynach — praź niepapularnaść Trampa ŭ Kanadzie. Sam Karni heta admaŭlaje.

• 0
• 0
• 0
• 2
• 0
• 0
• 0
• 0