У Данецку ўзарвалі забойцу генерала ўкраінскай разведкі. Пра аперацыю маўчалі больш за месяц
Украінскія спецслужбы ўзарвалі аўтамабіль Алега Шутава. Ён, як сцвярджае СБУ, асабіста ў Кіеве падклаў бомбу пад машыну генерал-маёра вайсковай разведкі Украіны Максіма Шапавала.
Алега Шутава ўзарвалі 27 ліпеня ў акупаваным Данецку, піша LB.ua са спасылкай на крыніцы ва ўкраінскіх спецслужбах.
Самаробную выбуховую прыладу заклалі ў Subaru, на якім Шутаў прыехаў да спартыўнага комплексу «Дынама» ў Ленінскім раёне Данецка.
Мясцовыя прарасійскія рэсурсы тады паведамлялі пра «начную атаку беспілотніка», у выніку якой нібыта пацярпеў кіраўнік федэрацыі спартыўнай барацьбы.
Шутаў сапраўды ўзначальваў асацыяцыю дзюдо і самба так званай ДНР, адначасова Шутаў быў супрацоўнікам так званага «Цэнтра спецыяльных аперацый Міністэрства дзяржаўнай бяспекі ДНР». У 2024 годзе гэтае ведамства ліквідавалі, а яго функцыі перадалі мясцоваму ўпраўленню ФСБ.
Служба бяспекі Украіны ўпершыню публічна назвала Шутава забойцам генерал-маёра Максіма Шапавала ў красавіку 2019 года.
«Менавіта гэты чалавек 26 чэрвеня 2017 года заклаў выбуховую прыладу пад аўтамабіль генерала ўкраінскай разведкі Максіма Шапавала. Сёння мы ўпершыню абнародуем дэталі выканаўцы гэтага тэрарыстычнага акту», — заяўляў тагачасны кіраўнік СБУ Васіль Грыцак.
Шутаў зняў кватэру ў доме, дзе жыў Шапавал, а таксама арандаваў месца на паркоўцы побач з машынай генерала. 27 чэрвеня 2017 года аўтамабіль Шапавала ўзарваўся ў Саламянскім раёне Кіева. Генерал загінуў. Паводле СБУ, праз гадзіну пасля выбуху Шутаў забраў рэчы з арандаванай кватэры і выехаў у Расію, а адтуль — на Данбас.
Шутава таксама звязвалі з забойствам начальніка аддзела контрразведкі СБУ ў Данецкай вобласці палкоўніка Аляксандра Хараберуша. Яго аўтамабіль узарвалі ў Марыупалі 31 сакавіка 2017 года.
Інфармацыю пра ліквідацыю Шутава не публікавалі больш за месяц з меркаванняў бяспекі — пакуль дыверсійная група не вярнулася з акупаванай тэрыторыі.
Каментары