МЗС Літвы назвала сустрэчу Турчына з літоўскімі перавозчыкамі прапагандысцкім крокам
Пасля сустрэчы з прадстаўнікамі перавозчыкаў у Мінску 17 сакавіка беларускія ўлады заявілі, што не маюць намеру канфіскоўваць літоўскія і польскія грузавікі, якія затрыманыя на тэрыторыі краіны. Паводле афіцыйнай інфармацыі, Мінск хоча знайсці «канструктыўнае рашэнне» і выхад з сітуацыі. Але літоўскае МЗС прыкметаў гэтага не бачыць, паведамляе LRT.
Праблема ўзнікла пасля таго, як з канца кастрычніка, пасля часовага перакрыцця Літвой дзяржаўнай мяжы, Беларусь пачала затрымліваць літоўскія грузавікі і накіроўваць іх на спецыяльныя стаянкі пад кантролем мытных органаў. Гэтыя стаянкі кіруюцца кампаніяй, якая знаходзіцца пад санкцыямі ЕС. За знаходжанне транспарту спаганяецца плата каля 120 еўра ў суткі за кожны грузавік або паўпрычэп. Першапачаткова беларускія ўлады нават пагражалі канфіскацыяй тэхнікі пасля некалькіх месяцаў.
Цяпер Мінск заяўляе, што не плануе канфіскацыю, але падкрэслівае: выдаткі за стаянку павінны быць кампенсаваныя. Гэта выклікае занепакоенасць у перавозчыкаў, бо сума можа аказацца вельмі вялікай — часам нават большай за кошт самога транспартнага сродку.
Літоўскае Міністэрства замежных спраў рэзка раскрытыкавала гэтыя дзеянні. Там лічаць, што ўчарашняя сустрэча з перавозчыкамі з удзелам прэм’ер-міністра Аляксандра Турчына, разам з заявамі пра «мірнае вырашэнне» — гэта толькі прапагандысцкі крок і частка гібрыднай кампаніі ціску на Літву. Паводле літоўскага боку, Беларусь наўмысна затрымлівае транспарт і выкарыстоўвае сітуацыю ў палітычных мэтах.
Літва патрабуе неадкладна выпусціць усе затрыманыя грузавікі і спыніць іншыя дзеянні, якія яна лічыць варожымі, у тым ліку запуск кантрабандных паветраных шароў, якія могуць пагражаць бяспецы авіяцыі.
Пры гэтым адзначаецца, што ў сустрэчы з беларускім прэм’ерам не ўдзельнічалі асноўныя галіновыя арганізацыі Літвы — ні найбуйнейшая Linava, ні іншыя буйныя аб’яднанні. Туды паехала толькі ініцыятыўная група перавозчыкаў. Паводле прадстаўнікоў галіны, пакуль няма дакладнай інфармацыі, якое канчатковае рашэнне прыме Беларусь, але чакаецца, што яно можа з’явіцца ў бліжэйшы час.
Паводле розных даных, у Беларусі было затрымана ад некалькіх сотняў да некалькіх тысяч літоўскіх грузавікоў і паўпрычэпаў. Частка ўжо вярнулася, але значная колькасць застаецца на тэрыторыі краіны, і перавозчыкі нясуць істотныя фінансавыя страты.
Цяпер чытаюць
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння77
Каментары