Іран атакаваў французскую базу ў Абу-Дабі — адна з ракет упала за некалькі метраў ад круізнага лайнера з турыстамі
Корпус вартавых ісламскай рэвалюцыі (КВІР) Ірана заявіў пра нанясенне камбінаваных удараў па ваенных аб'ектах на тэрыторыі Аб'яднаных Арабскіх Эміратаў. Галоўнай цэллю стала французская ваенна-марская база Camp de la paix («Лагер міру») у Абу-Дабі. Інцыдэнт выклікаў паніку сярод еўрапейскіх турыстаў: адзін са снарадаў разарваўся ў вадзе ў непасрэднай блізкасці ад пасажырскага лайнера.
Афіцыйнае пацверджанне атакі паступіла ад Міністэрства абароны ААЭ. Паводле дадзеных ведамства, па ваенна-марской базе Аль-Салам у Абу-Дабі ўдарылі два іранскія беспілотнікі. У выніку атакі ўспыхнуў пажар у двух кантэйнерах з будаўнічымі матэрыяламі. Інфармацыі пра загінулых або параненых на дадзены момант няма.
Паводле папярэдніх ацэнак экспертаў, для нападу выкарыстоўваліся дроны-камікадзэ тыпу Shahed.
Camp de la paix (з фр. — «Лагер міру») — гэта стратэгічны ваенны аб'ект Узброеных сіл Францыі ў ААЭ, адкрыты ў 2009 годзе тагачасным прэзідэнтам Нікаля Сарказі. Яе стварэнне стала вынікам абароннага пагаднення паміж Парыжам і Абу-Дабі. Гэта была першая французская ваенная база, створаная за межамі Афрыкі за паўстагоддзя.
У сваю чаргу, іранскі КВІР узяў на сябе адказнасць не толькі за ўдар па французскім аб'екце. У Тэгеране заявілі, што адначасова з гэтым чатыры балістычныя ракеты былі выпушчаныя па амерыканскім авіяносцы USS Abraham Lincoln. Аднак незалежнага пацверджання або каментарыяў з боку ЗША наконт атакі на карабель пакуль не паступала.
Паніка на нямецкім круізным лайнеры
Атака на ваенныя аб'екты ледзь не прывяла да масавых ахвяр сярод грамадзянскага насельніцтва. Як паведамляе нямецкае выданне BILD са спасылкай на відавочцаў, адна з ракет упала ў акваторыі порта Заед літаральна за некалькі метраў ад круізнага лайнера Mein Schiff 4, які належыць кампаніі TUI Cruises.
Пасажыры карабля перажылі сапраўдны шок. Адзін з нямецкіх турыстаў паспеў паведаміць журналістам, што каля 16:30 (па нямецкім часе) на мабільныя тэлефоны людзей прыйшло экстранае апавяшчэнне з загадам неадкладна сабрацца ў тэатры на борце судна. Пасля гэтага сувязь з ім перапынілася. На гэты момант невядома, ці ёсць пацярпелыя сярод 2500 пасажыраў і 1000 членаў экіпажа.
Сітуацыя сур'ёзна ўдарыла па турыстычнай галіне ў рэгіёне. Цяпер у партах Дубая, Абу-Дабі і Дохі (Катар) прышвартаваныя шэсць вялікіх круізных лайнераў розных кампаній (у тым ліку MSC Cruises і Celestyal Cruises). Аператары ўжо абвясцілі аб адмене бліжэйшых рэйсаў і працуюць разам з мясцовымі ўладамі над забеспячэннем бяспекі турыстаў.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Калі шандарахне па цягніку, хто будзе лідарам дэмсіл?» Два дні з дэлегацыяй Ціханоўскай у Кіеве — што засталося за кадрам30
Каментары