Пісаў у чатах па-беларуску і сам рамантаваў сваё аўто. Кіраўніка інавацый IT-кампаніі 4RM Systems кінулі за краты за палітыку
Кіраўніка аддзела інавацыйных даследаванняў кампаніі 4RM Systems Аляксандра Сульжыца асудзілі, як мяркуецца, па справе Гаюна. Ён прыйшоў у сферу IT з лагістыкі і гандлю металам.
Аляксандру Сульжыцу 44 гады. Ён родам з Пінска. У 2005 годзе скончыў Беларускі дзяржаўны эканамічны ўніверсітэт па спецыяльнасці «Фінансы і крэдыт».
Яго кар'ера пачыналася з лагістыкі — працаваў менеджарам па транспарце ў «Пінскдрэве», потым займаў пасады ў Belinterlogistik і ElektroEra. Пасля Сульжыц працаваў менеджарам па закупках у міжнароднай кампаніі Exide Technologies. Далей перайшоў у гандаль металам, а яшчэ пазней вярнуўся ў лагістыку.
З 2019 па 2022 год Сульжыц працаваў у Rozum Robotics, дзе прайшоў шлях ад менеджара па пастаўках да кіраўніка аддзела робататэхнічнай аўтаматызацыі. Апошнім месцам працы была 4RM Systems (май 2023 — май 2025), дзе Аляксандр займаўся распрацоўкай рашэння Stemma са штучным інтэлектам для аўтаматызацыі кас самаабслугоўвання ў рытэйле — менавіта касы ад 4RM Systems стаяць у многіх беларускіх крамах.
Хіба найбольшае захапленне Аляксандра — гэта аўтамабілі. Мужчына быў актыўным удзельнікам аўтасупольнасці: дапамагаў пачаткоўцам парадамі, бо і сам рамантаваў сваё аўто.
Яшчэ Аляксандр любіць здымаць. Ён цікавіўся не банальнымі здымкамі, а індастрыялам, здымаў вытворчыя працэсы, напрыклад, зварку аргонам, для чаго спецыяльна шукаў рэдкія фільтры. Любіць фатаграфаваць і прыроду.
Сульжыц — дасведчаны падарожнік. У сацсетках ён падрабязна апісваў маршруты, раіў, якія сім-карты купляць і як пазбягаць штрафаў у замежжы.
Аляксандр часта адказваў у розных чатах па-беларуску. У яго ёсць жонка і двое дзяцей.
Сульжыца затрымалі каля васьмі месяцаў таму — ён акурат звольніўся і шукаў працу. Аляксандра асудзілі ў канцы 2025 года ці ў пачатку 2026 года ў Мінскім гарадскім судзе паводле ч. 1 і ч. 2 арт. 361‑4 Крымінальнага кодэкса — «садзейнічанне экстрэмісцкай дзейнасці».
Яму прысудзілі ці хімію з накіраваннем, ці калонію.
«Наша Нiва» — бастыён беларушчыны
ПАДТРЫМАЦЬЦяпер чытаюць
Арыштаваны міністр прыродных рэсурсаў выбраў «стратэгію Брыло»9
Каментары
Кожны раз, калі такое чытае, мне не па сабе, бо прыйсці могуць за кожным.