У Турцыі з 1 лістапада абмяжуюць выкарыстанне сацыяльных сетак дзецьмі. Адпаведны нарматыўны акт Упраўлення кібербяспекі пры адміністрацыі прэзідэнта Турцыі апублікавалі 10 кастрычніка ў дзяржаўным весніку Resmi Gazete.
Згодна з дакументам, сацыяльныя сеткі не змогуць выконваць свае паслугі дзецям маладзейшым за 15 гадоў. Для карыстальнікаў ва ўзросце ад 15 да 18 гадоў платформы павінны стварыць асобны рэжым з узмоцненымі мерамі бяспекі і абароны прыватнасці. Праверку ўзросту ва ўжо створаных і актыўных акаўнтах неабходна будзе закончыць да 31 сакавіка 2027 года.
Узрост карыстальнікаў будуць пацвярджаць праз агульнанацыянальную сістэму дзяржаўных паслуг e-Devlet з дапамогай спецыяльнага ідэнтыфікатара.
Акаўнты падлеткаў ад 15 да 18 гадоў апрыёры будуць закрытымі. Ім забароняць весці жывыя трансляцыі, атрымліваць персаналізаваную рэкламу і карыстацца асобнымі механізмамі рэкамендацыі кантэнту.
Сацыяльныя сеткі таксама не змогуць рэкамендаваць непаўналетнім іншыя акаўнты на падставе сабраных пра іх даных. Профілі саміх падлеткаў нельга будзе прапаноўваць іншым карыстальнікам.
Акрамя таго, узмоцняць абарону асабістых даных непаўналетніх. Платформам забароняць сінхранізаваць дзіцячыя акаўнты з тэлефоннымі кнігамі, спісамі кантактаў, адраснымі кнігамі электроннай пошты, а таксама пералікамі сяброў і падпісак у іншых праграмах і на іншых платформах. Ім таксама нельга будзе атрымліваць доступ да гэтых крыніц і апрацоўваць атрыманыя адтуль даныя.
Нарматыўны акт абавязвае сацыяльныя сеткі распрацаваць і даць бацькам і апекунам інструменты кантролю за акаўнтамі дзяцей, іх наладамі, часам выкарыстання платформаў, геалакацыяй, платнымі аперацыямі і іншымі функцыямі.
Увядзенне падобных абмежаванняў на сацсеткі для дзяцей цяпер абмяркоўваецца і ў краінах Еўрасаюза, а Вялікабрытанія гэта ўжо зрабіла раней.
Цяпер чытаюць
Малодшы сын Сахашчыка абвешчаны зніклым без вестак. Выглядае, ён ваяваў за Расію99
Малодшы сын Сахашчыка абвешчаны зніклым без вестак. Выглядае, ён ваяваў за Расію
«Запрасіў мяне на спатканне і прыехаў на яго з пакетам памідораў замест кветак». Што ўспамінаюць пра Яна Памедора Рэуцкага, адміна шматтысячнай суполкі беларусаў Польшчы55
Каментары