Літоўскія ўлады канстатавалі паляпшэнне сітуацыі з кантрабанднымі шарамі з Беларусі
Дарадца прэзідэнта Літвы Дэйвідас Матулёніс заявіў, што сітуацыя з кантрабанднымі паветранымі шарамі, якія запускаліся з тэрыторыі Беларусі і перашкаджалі працы аэрапортаў, істотна палепшылася. Паводле яго слоў, ужо каля паўтара месяца не ўзнікала сур’ёзных праблем, праз якія даводзілася б спыняць працу аэрапортаў, хоць умовы надвор’я былі рознымі, паведамляе lrytas.lt.
Разам з тым Дэйвідас Матулёніс адзначыў, што пакуль рана сцвярджаць, што праблема цалкам вырашаная і мае ўстойлівы характар — за сітуацыяй трэба яшчэ назіраць.
Ён лічыць, што на змяншэнне колькасці такіх інцыдэнтаў паўплывала адразу некалькі фактараў: актыўная праца літоўскіх праваахоўных органаў супраць арганізатараў кантрабанды, кліматычныя ўмовы, а таксама магчымы ціск з боку ЗША.
У прыватнасці, не выключаецца, што вынік дало патрабаванне спецыяльнага пасланніка ЗША Джона Коўла, які падчас сустрэчы з Аляксандрам Лукашэнкам заклікаў спыніць запуск шароў, якія Літва разглядае як элемент гібрыднай атакі. Раней амерыканскі дыпламат паведамляў, што Лукашэнка паабяцаў спыніць такія дзеянні.
Нягледзячы на часовае зацішша, улады Літвы падкрэсліваюць, што пагроза не знікла цалкам. Кіраўнік Нацыянальнага цэнтра кіравання крызісамі і прадстаўнікі ўрада лічаць неабходным захоўваць пільнасць і пакуль не адмяняць рэжым надзвычайнай сітуацыі, уведзены ў краіне праз крызіс з шарамі. Прэм’ер-міністарка Літвы Інга Ругінене таксама адзначыла, што ацэньваць сітуацыю як канчаткова стабілізаваную пакуль рана, а барацьба з кантрабандай будзе працягвацца.
«Мы цалкам разумеем, якая там дзяржава». Літоўскія перавозчыкі не збіраюцца падаваць пазовы ў беларускія суды праз затрыманыя фуры
Літва нанесла маштабны ўдар па «балонікавай» мафіі: затрыманыя кіраўнікі і дзясяткі кантрабандыстаў
Лукашэнка пра паветраныя шары з Беларусі: Я размаўляў з лётчыкамі, для самалётаў ніякай праблемы няма
Авіякампаніі пакуль не збіраюцца масава касаваць рэйсы ў Вільню. Але прэцэдэнты ўжо ёсць
Каментары