Сталі вядомыя абставіны падрыву дарогі каля манумента «Тры сястры» на мяжы Беларусі, Расіі і Украіны ў 2023 годзе
Падрыў адбыўся на ўкраінскай тэрыторыі, за 75 метраў ад мяжы з Беларуссю.
Новыя абставіны ўдалося ўстанавіць дзякуючы фатаграфіям, якія апынуліся ў распараджэнні «Флагштока».
На іх зафіксаваныя падрыхтоўка і сам момант падрыву дарогі каля манумента «Тры сястры» на мяжы Украіны, Беларусі і Расіі. Фотаздымкі перадаў прадстаўнік украінскага боку ў сувязі з публікацыяй «Флагштокам» касмічных здымкаў аб’ектаў памежжа.
Падрыў адбыўся 30 мая 2023 года на ўкраінскай тэрыторыі, за 75 метраў ад мяжы з Беларуссю. Расійскія вайскоўцы тады ўзарвалі ўчастак дарогі Чарнігаў — Бранск. Пра гэта паведамляла ўкраінская Дзяржаўная памежная служба, якая зафіксавала выбух у раёне стыку межаў трох дзяржаў.
Відэазапіс выбуху апублікавалі расійскія Z-ваенкары. Яны сцвярджалі, што дарога была знішчана з дапамогай авіяцыйнай бомбы на «танканебяспечным напрамку», каб не дапусціць магчымага прасоўвання ўкраінскіх падраздзяленняў у бок Бранскай вобласці.
Да гэтага часу па апублікаваных кадрах было немагчыма дакладна ўстанавіць, якім спосабам быў праведзены падрыў.
Фатаграфіі, апублікаваныя «Флагштокам», дазваляюць удакладніць абставіны аперацыі. На здымках бачная падрыхтоўка дарогі да падрыву — перанос доўгіх цяжкіх зарадаў з расійскага пункта пропуску, вяртанне салдат з украінскай тэрыторыі і вынікі падрыву.
Выбуховы зарад быў пракладзены ў трубе пад дарогай, пасля чаго адбыўся выбух. У выніку падрыву ўтварылася шырокая спадзістая канава, якая наўрад ці магла стаць сур’ёзнай перашкодай для гусенічнай тэхнікі.
Падрыў адбыўся праз некалькі дзён пасля рэйду расійскіх добраахвотніцкіх фармаванняў у Белгарадскую вобласць. Расійскія ўлады ў той перыяд заяўлялі пра пранікненне ўкраінскіх дыверсійных груп на сваю тэрыторыю.
Пры гэтым месца падрыву мае і асобнае сімвалічнае значэнне. Манумент «Тры сястры» быў усталяваны ў 1975 годзе на стыку межаў Беларусі, Расіі і Украіны як сімвал «дружбы народаў». У красавіку 2019 года Беларусь выдзеліла каля 2 мільёнаў рублёў на рамонт манумента і добраўпарадкаванне прылеглай тэрыторыі. У прыватнасці, былі выкладзеныя тры дарожкі з нацыянальнымі арнаментамі Беларусі, Расіі і Украіны.
У красавіку 2022 года, ужо пасля пачатку поўнамаштабнага ўварвання Расіі ва Украіну, тагачасны мэр Чарнігава Уладзіслаў Атрашэнка заявіў пра неабходнасць дэмантаваць украінскую частку манумента пасля расійскага ўварвання з тэрыторыі Беларусі.
Пасля заявы Атрашэнкі беларуская прапаганда разгарнула супраць яго кампанію. Яго патрабаванне аб дэмантажы ўкраінскай часткі манумента падавалася як чарговая атака на сімвал «дружбы» Беларусі, Расіі і Украіны.
Праз год пасля гэтай кампаніі расійскія вайскоўцы самі знішчылі дарогу непасрэдна каля манумента — прычым зрабілі гэта мэтанакіравана, загадзя заклаўшы зарад пад дарожным палатном.
Разбурэнні, якія ў выніку адбыліся, аказаліся значна больш рэальным ударам па манументальным комплексе «Тры сястры», чым заявы ўкраінскага мэра пра дэмантаж манумента.
Цяпер чытаюць
«Беларусь перадусім». Што вядома пра 23‑гадовага афіцэра спецназа, якога асудзілі на 19 гадоў за «здраду дзяржаве»18
Каментары
Поэтому грош цена этой куче цемента, хорошая цель для украинского дрона.
"Кто усомнится в нашем миролюбии, тот умоется собственной кровью".