У папулярным амерыканскім серыяле паказалі беларускую турму — знялася ўладальніца «Оскара»
У топавым амерыканскім серыяле «Ранішняе шоу» паказалі беларускую турму, як яе ўяўляюць на Захадзе. Была там і несправядліва затрыманая гераіня — яе сыграла ўладальніца «Оскара» Рыз Уізерспун.
Гаворка пра серыял «Ранішняе шоу» (The Morning Show), які выходзіць з 2019 года. Сюжэт круціцца вакол аднайменнай навінавай праграмы і яе вядоўцы Алекс Леві — яе грае яшчэ адна топавая зорка, Джэніфер Эністан.
Аднак у Леві з'яўляецца канкурэнтка. Гэта Брэдлі Джэксан, рэпарцёрка, якая выпадкова трапіла ў свет тэленавінаў, і якраз яе грае Рыз Уізерспун.
У чацвёртым сезоне серыяла, які выходзіў з верасня па лістапад 2025-га, Брэдлі расследуе гісторыю з хімічным заводам, які звязаны з экалагічнай катастрофай. Каб атрымаць дадатковую інфармацыю, жанчына ляціць у Беларусь — там яе чакае сустрэча з чарговай крыніцай.
Але ж на сустрэчу яна так і не трапіла. Жанчыну арыштавалі ўжо ў мінскім аэрапорце і кінулі за краты, абвінаваціўшы ў шпіянажы. Брэдлі паспявае толькі запісаць відэа з інфармацыяй, што ў яе праблемы.
Тады Алекс, галоўная гераіня серыяла, ідзе на сустрэчу з рускім алігархам і спрабуе праз яго выцягнуць калегу. Але ў яе не атрымліваецца: сярод журналістаў, якія ведаюць пра гэтую гісторыю, ёсць чалавек, які не можа дапусціць расследавання супраць хімічнага завода.
У выніку амерыканку ўсё ж вызваляюць з беларускай турмы — для гэтага Алекс давялося прынесці свае ахвяры. Але Брэдлі праводзіць месяц у жудасных умовах.
У яе брудная камера, ёй не даюць спаць — усё праз яркае святло і гучны хэві-мэтал з дынамікаў. Перыядычна турэмшчыкі спыняюць катаванні, тады амерыканку спрабуюць дапытаць пра тое, з кім яна збіралася сустрэцца ў Беларусі. Але для яе больш значыць журналісцкая этыка: на паперы, дзе яе просяць напісаць імя крыніцы, Брэдлі піша па-англійску «Ідзіце н***й». За гэта яе пазбаўляюць койкі.
У 2026‑м пачнуць здымаць пяты сезон праекта — магчыма, тады мы даведаемся нешта новае пра час, які Брэдлі правяла ў беларускай турме.
«Наша Нiва» — бастыён беларушчыны
ПАДТРЫМАЦЬЦяпер чытаюць
Прылукі пад Мінскам на хвалі хайпу — беларусы масава паехалі туды па здымкі ў стылі «Прыцемак». Мясцовыя не ў захапленні10
Прылукі пад Мінскам на хвалі хайпу — беларусы масава паехалі туды па здымкі ў стылі «Прыцемак». Мясцовыя не ў захапленні
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў55
Каментары