Беларускі бізнэсмен аднаўляе гістарычны палац Любамірскіх у Беластоку. Там будзе гатэль і рэстаран
Беларускі бізнэсмен Аляксей Навіцкі, які з'яўляецца ўладальнікам беластоцкай газа-хімічнай кампаніі WGT Group, пачаў рэканструкцыю гістарычнай славутасці — Палаца Любамірскіх у раёне Дайліды ў Беластоку, піша эканамічны аглядальнік Вадзім Сяховіч.
У адноўленым будынку будзе размешчаны гатэль і рэстаран.
WGT Group стала ўладальнікам палаца ў лістападзе 2020 года, выкупіўшы яго на аўкцыёне за 6,5 млн злотых (пачатковая цана была 4,2 млн злотых).
Актыўная рэканструкцыя пачалася ўвесну 2025 года.
Палац Любамірскіх — адно са знакавых месцаў адміністрацыйнага цэнтра Падляскага ваяводства, рэкамендаваны да наведвання турыстычны аб’ект. Яго ў 1850‑х у тады яшчэ вёсцы Дайліды пабудаваў расійскі барон Аляксандр Крузенштэрн — сын вядомага мараплаўца адмірала Івана Крузенштэрна. Ад яго дачкі і спадчынніцы Сафіі фон Рудыгер палац перайшоў ва ўласнасць да князя Ежы Рафала Любамірскага.
У час германскай акупацыі Польшчы ў 1940‑х у ім месцілася рэзідэнцыя гаўляйтэра Усходняй Прусіі, рэйхскамісара Украіны і начальніка грамадзянскага ўпраўлення акругі Беласток Эрыка Коха.
У часы ПНР палац заняў сельскагаспадарчы тэхнікум, а ўжо ў сучаснай Польшчы гарадскія ўлады ў 1990‑х прадалі яго разам з прылеглым на 26 гектарах паркам усяго за 160 тыс. злотых прыватнай Вышэйшай школе публічнай адміністрацыі імя Станіслава Сташыца.
Адукацыйная ўстанова, у рэканструкцыю і пашырэнне якой былі прыцягнутыя еўрапейскія грошы, квітнела пры яе першай уладальніцы, прафесаркі, былой міністаркі культуры і шматгадовай еўрадэпутаткі Барбары Кудрыцкай. Але з 2010‑х пачала прыходзіць у заняпад. У 2016 г. новым гаспадаром палаца Любамірскіх стала кампанія PQE. Праўда, у 2019‑м яна збанкрутавала.
Кампанія WGT Group належыць беларусу Аляксею Навіцкаму і грамадзянцы Польшчы Моніцы Каміле Гуль. WGT Group, заснаваная ў 2017 годзе, уваходзіць у лік вядучых інвестыцыйных праектаў беларусаў у Польшчы.
Каментары