У Беларусі скардзяцца на жахлівы дэфіцыт кіроўцаў. А якія зарплаты ім прапануюць?
Нядаўна ў эфіры СТБ прагучала, што недахоп шафёраў прыводзіць да трагедый на дарогах. «Выязджаюць па доўгі рубель. У Беларусі ў нас вельмі нізкі ўзровень жыцця. Ну і заробак адпаведна». Прапагандыст Кірыл Казакоў на гэта запярэчыў, што кіроўцам у нас плацяць па 4000 рублёў. А як насамрэч?
Агулам у дзяржаўным банку вакансій каля 10 тысяч прапаноў для кіроўцаў розных катэгорый, што складае амаль 6% ад усіх вакансій у краіне.
Традыцыйна самыя высокія зарплаты абяцаюць кіроўцам-міжнароднікам з катэгорыямі СЕ.
Самы высокі заробак, што можна цяпер знайсці, — 5500 рублёў на месяц (каля $1850), але гэта работа па Еўрасаюзе, бо трэба мець польскую візу D і пажадана — досвед працы па Еўропе.
Максімум, які прапануюць кіроўцам без візы, — 4000‑5000 рублёў. Такі кіроўца павінен мець катэгорыю СЕ і быць гатовы выконваць рэйсы Беларусь — Расія.
Кіроўцы, якім не трэба ездзіць у доўгія замежныя камандзіроўкі, могуць разлічваць толькі на сціплыя заробкі. Так, напрыклад, у Першамайскім дэпартаменце аховы МУС шукаюць кіроўцаў катэгорый В і D. Абяцаюць 1300—1600 рублёў.
У «Мінскэнерга» шукаюць кіроўцу грузавіка катэгорыі С з зарплатай 1500‑1850 рублёў.
Патрэбны кіроўцы і на завод «Атлант». Там абяцаюць ад 1200 да 2100 рублёў на месяц.
Заробкі шафёраў катэгорыі В
Мінскае аддзяленне Беларускай чыгункі кіроўцу легкавіка гатова плаціць 1094‑1642 рублі. Нацыянальны акадэмічны аркестр сімфанічнай і эстраднай музыкі — 1000‑1100 рублёў.
На МАПІДзе кіроўца легкавога аўто можна атрымліваць 1750 рублёў.
Кіроўцам на хуткай у Мінску абяцаюць ад 1200 да 1600 рублёў, калі чалавек без досведу і мае толькі катэгорыю В.
Заробкі кіроўцаў аўтобусаў і маршрутак у Беларусі
Ecolines шукае кіроўцу з катэгорыямі D/DE, які будзе выконваць міжнародныя рэйсы. Гатовы плаціць ад 2200 да 3200 рублёў на рукі.
Кіроўцу маршруткі ў Мінску абяцаюць 3500‑4500 рублёў на рукі.
Былы маршрутчык дзеліцца, што заробкі сапраўды даволі высокія. Каля 1000 даляраў на гарадскіх маршрутках зараблялі і дзесяць гадоў таму.
У некаторых умовы працы такія, што кіроўца павінен аддаць працадаўцу пэўную дзённую суму, а ўсё астатняе — гэта свой заробак. Маўляў, такім чынам адсутнічае матывацыя падманваць працадаўцу.
Але працаваць на гарадской маршрутцы складана. На міжгародных рэйсах нагрузка меншая, але трапіць туды цяжэй.
Па словах былога маршрутчыка, асабліва добра працаваць на маршрутах, дзе людзі адпраўляюць шмат перадач. Тады кіроўцы зарабляюць годныя грошы, дый ездзіць па трасе нашмат прыемней, чым увесь дзень круціцца ў горадзе.
Колькі зарабляюць шафёры ў рэгіёнах Беларусі
Кіроўцу аўтобуса ў Віцебскаблаўтатрансе абяцаюць ад 2110 рублёў на рукі. У Гомельаблаўтатрансе — ад 2100 да 4500 на рукі.
Гомельскае абласное спажыўтаварыства шукае персанальнага кіроўцу катэгорыі В на зарплату ад 1300 рублёў чыстымі. Графік — васьмігадзінны 5/2.
У Брэсце кіроўцу-кур’еру без уласнага аўто прапануюць каля 1300 рублёў на рукі.
Мужчына, які шукае працу ў адным з абласных цэнтраў і мае катэгорыі В і С, кажа, што пад катэгорыю В максімум, на які можна разлічваць у ягоным горадзе, — гэта 1300‑1400 рублёў чыстымі. Але знайсці працу ўсё адно няпроста.
У адным месцы мужчыну не ўзялі праз узрост (яму хутка споўніцца 60), у іншым — праз тое, што ў яго нібыта шмат штрафаў па лініі ДАІ, а ў трэцім сказалі, што з картай паляка ў іх не бяруць (гэта была дзяржаўная ўстанова).
Што тычыцца грузавой катэгорыі, то мужчына спрабаваў працаваць, але за месяц з перапрацоўкамі, начнымі зменамі і зменамі ў выходныя максімум, які ён меў, — гэта 2000‑2200 рублёў. А калі не перапрацоўваць, то будзе каля 1500.
Колькі можна зарабіць у таксі?
У сталіцы таксісты, якія гатовыя шмат працаваць, могуць мець 2500‑3000 рублёў на рукі. У абласных гарадах зарабляюць менш — 2000‑2200 рублёў.
Адметна, што вырашаць праблему з недахопам кіроўцаў намагаюцца ў тым ліку прыцягваючы замежнікаў. Кіроўцы аўтамабіляў з 1 ліпеня 2023 года ўвайшлі ў спіс прафесій, па якіх работнікаў-замежнікаў прымаюць на працу ў спрошчаным парадку. Спрошчаны парадак працягне дзейнічаць і ў 2026 годзе.
Сярод таксістаў цяпер, напрыклад, усё больш кіроўцаў з Туркменістана і Кыргызстана.
Каментары