Расійскіх вайскоўцаў падазраюць у выкарыстанні затанулага парома «Эстонія» для шпіянажу і адпрацоўкі падводных аперацый

Паводле звестак некалькіх краін НАТА, некалькі гадоў таму на абломках былі замацаваныя тэхнічныя прылады, якія дазваляюць ажыццяўляць высокадакладную навігацыю падводных дронаў і робатаў. Пра гэта гаворыцца ў сумесным расследаванні нямецкіх тэлеканалаў WDR, NDR і газеты Süddeutsche Zeitung (SZ), апублікаваным у пятніцу, 24 кастрычніка, піша выданне DW.

Расійскія вучэнні і магчымыя датчыкі

Паводле версіі СМІ, у заходніх колах, якія займаюцца пытаннямі бяспекі, лічаць, што расійскія вайскоўцы праводзілі ў гэтым раёне адпаведныя вучэнні. Расія таксама магла ўсталяваць там датчыкі, якія дазваляюць фіксаваць сігнатуры караблёў і падлодак НАТА, пішуць WDR, NDR і SZ.

Паром «Эстонія» затануў у верасні 1994 года. Праз год пасля катастрофы Швецыя, Эстонія і Фінляндыя падпісалі пагадненне, якое забараняе спуск да абломкаў, каб не парушаць спакой загінулых. Судна было пабудавана ў 1979 годзе на верфі ў ФРГ.

Падводную разведку вядзе структура пры Міністэрстве абароны РФ

За падводную разведку такога тыпу ў Расіі адказвае Галоўнае ўпраўленне глыбакаводных даследаванняў Міністэрства абароны РФ. У задачы ўпраўлення ўваходзіць разведка ў раёнах крытычна важнай інфраструктуры, такой як падводныя кабелі і трубаправоды еўрапейскіх краін.

Упраўленне мае флот спецыяльных суднаў, афіцыйна зарэгістраваных як даследчыя, і шырокае тэхнічнае абсталяванне — малыя падлодкі, падводныя робаты, магутныя санарныя і сканавальныя сістэмы для падводнай разведкі.

У прыватнасці, гаворка ідзе пра акіянаграфічнае доследнае судна «Янтар» Паўночнага флоту. Паводле звестак, Галоўнае ўпраўленне глыбакаводных даследаванняў выкарыстоўвае гідрафоны для запісу руху караблёў праціўнікаў.

Частка тэхнікі закуплялася праз кампанію на Кіпры, пішуць NDR, WDR і SZ. Паводле іх даных, гаворка ішла пра здзелкі на суму каля 50 мільёнаў долараў (прыкладна 43 мільёны еўра). Некаторыя ўзоры гэтай тэхнікі выкарыстоўваліся для стварэння комплекснай сістэмы назірання ў Арктыцы пад назвай «Гармонія» — падводная сэнсарная сістэма ўстаноўлена ў Баранцавым моры для аховы расійскага арсеналу ядзернай зброі.

Паводле звестак, расійскія сістэмы з датчыкамі, верагодна, выкарыстоўваюцца і ў Балтыйскім моры. У пачатку 2024 года Літва паведаміла, што на Куршскай касе быў знойдзены гідраакустычны гідралакатар расійскай вытворчасці.

Рэакцыя ўладаў

Улады Фінляндыі і Эстоніі не пацвердзілі высновы WDR, NDR і SZ, якія датычацца парома «Эстонія».

Міністэрства замежных спраў Эстоніі заявіла, што разам з саюзнікамі ўважліва сочыць за сітуацыяй у Балтыйскім моры. Фінская пагранічная служба паведаміла, што з аператыўных прычын не раскрывае падрабязнасцяў, якія датычацца магчымых мер назірання.

«Эстонскія даныя не пацвярджаюць такіх сцвярджэнняў. Розныя ведамствы Эстоніі разам з саюзнікамі ўважліва назіраюць за падзеямі ў Балтыйскім моры. Гэты раён з’яўляецца адным з найбольш кантралюемых», — адзначыў прадстаўнік Міністэрства абароны Эстоніі ў каментары Postimees.

Прадстаўнік Міністэрства абароны Германіі заявіў, што ведамства вядзе маніторынг падводнай дзейнасці, якая «можа быць накіраваная супраць крытычна важнай марской інфраструктуры або служыць мэтам шпіянажу». Падрабязнасці не прыводзяцца, бо гэта «магло б дазволіць зрабіць высновы пра нашы магчымасці ў галіне разведкі, выяўлення і рэгістрацыі ў падводным асяроддзі».

У НАТА публікацыю СМІ не пракаментавалі. Расійскі бок таксама не адказаў на запыты выданняў.

• 1
• 0
• 0
• 1
• 0
• 0
• 4
• 0