Rasijskich vajskoŭcaŭ padazrajuć u vykarystańni zatanułaha paroma «Estonija» dla špijanažu i adpracoŭki padvodnych apieracyj
Niamieckija ŚMI śćviardžajuć, što Rasija mahła vykarystoŭvać abłomki paroma «Estonija», jaki paciarpieŭ karablekrušeńnie, jak vučebnuju placoŭku dla padvodnych apieracyj u Bałtyjskim mory, a mahčyma — i dla ŭstanoŭki abstalavańnia dla padvodnaj raźviedki.
Pavodle źviestak niekalkich krain NATA, niekalki hadoŭ tamu na abłomkach byli zamacavanyja techničnyja pryłady, jakija dazvalajuć ažyćciaŭlać vysokadakładnuju navihacyju padvodnych dronaŭ i robataŭ. Pra heta havorycca ŭ sumiesnym rasśledavańni niamieckich telekanałaŭ WDR, NDR i haziety Süddeutsche Zeitung (SZ), apublikavanym u piatnicu, 24 kastryčnika, piša vydańnie DW.
Rasijskija vučeńni i mahčymyja datčyki
Pavodle viersii ŚMI, u zachodnich kołach, jakija zajmajucca pytańniami biaśpieki, ličać, što rasijskija vajskoŭcy pravodzili ŭ hetym rajonie adpaviednyja vučeńni. Rasija taksama mahła ŭstalavać tam datčyki, jakija dazvalajuć fiksavać sihnatury karabloŭ i padłodak NATA, pišuć WDR, NDR i SZ.
Parom «Estonija» zatanuŭ u vieraśni 1994 hoda. Praz hod paśla katastrofy Šviecyja, Estonija i Finlandyja padpisali pahadnieńnie, jakoje zabaraniaje spusk da abłomkaŭ, kab nie parušać spakoj zahinułych. Sudna było pabudavana ŭ 1979 hodzie na vierfi ŭ FRH.
Padvodnuju raźviedku viadzie struktura pry Ministerstvie abarony RF
Za padvodnuju raźviedku takoha typu ŭ Rasii adkazvaje Hałoŭnaje ŭpraŭleńnie hłybakavodnych daśledavańniaŭ Ministerstva abarony RF. U zadačy ŭpraŭleńnia ŭvachodzić raźviedka ŭ rajonach krytyčna važnaj infrastruktury, takoj jak padvodnyja kabieli i trubapravody jeŭrapiejskich krain.
Upraŭleńnie maje fłot śpiecyjalnych sudnaŭ, aficyjna zarehistravanych jak daśledčyja, i šyrokaje techničnaje abstalavańnie — małyja padłodki, padvodnyja robaty, mahutnyja sanarnyja i skanavalnyja sistemy dla padvodnaj raźviedki.
U pryvatnaści, havorka idzie pra akijanahrafičnaje doślednaje sudna «Jantar» Paŭnočnaha fłotu. Pavodle źviestak, Hałoŭnaje ŭpraŭleńnie hłybakavodnych daśledavańniaŭ vykarystoŭvaje hidrafony dla zapisu ruchu karabloŭ praciŭnikaŭ.
Častka techniki zakuplałasia praz kampaniju na Kipry, pišuć NDR, WDR i SZ. Pavodle ich danych, havorka išła pra ździełki na sumu kala 50 miljonaŭ dołaraŭ (prykładna 43 miljony jeŭra). Niekatoryja ŭzory hetaj techniki vykarystoŭvalisia dla stvareńnia kompleksnaj sistemy nazirańnia ŭ Arktycy pad nazvaj «Harmonija» — padvodnaja sensarnaja sistema ŭstanoŭlena ŭ Barancavym mory dla achovy rasijskaha arsienału jadziernaj zbroi.
Pavodle źviestak, rasijskija sistemy z datčykami, vierahodna, vykarystoŭvajucca i ŭ Bałtyjskim mory. U pačatku 2024 hoda Litva paviedamiła, što na Kuršskaj kasie byŭ znojdzieny hidraakustyčny hidrałakatar rasijskaj vytvorčaści.
Reakcyja ŭładaŭ
Ułady Finlandyi i Estonii nie paćvierdzili vysnovy WDR, NDR i SZ, jakija datyčacca paroma «Estonija».
Ministerstva zamiežnych spraŭ Estonii zajaviła, što razam z sajuźnikami ŭvažliva sočyć za situacyjaj u Bałtyjskim mory. Finskaja pahraničnaja słužba paviedamiła, što z apieratyŭnych pryčyn nie raskryvaje padrabiaznaściaŭ, jakija datyčacca mahčymych mier nazirańnia.
«Estonskija danyja nie paćviardžajuć takich śćviardžeńniaŭ. Roznyja viedamstvy Estonii razam z sajuźnikami ŭvažliva nazirajuć za padziejami ŭ Bałtyjskim mory. Hety rajon źjaŭlajecca adnym z najbolš kantralujemych», — adznačyŭ pradstaŭnik Ministerstva abarony Estonii ŭ kamientary Postimees.
Pradstaŭnik Ministerstva abarony Hiermanii zajaviŭ, što viedamstva viadzie manitorynh padvodnaj dziejnaści, jakaja «moža być nakiravanaja suprać krytyčna važnaj marskoj infrastruktury abo słužyć metam špijanažu». Padrabiaznaści nie pryvodziacca, bo heta «mahło b dazvolić zrabić vysnovy pra našy mahčymaści ŭ halinie raźviedki, vyjaŭleńnia i rehistracyi ŭ padvodnym asiarodździ».
U NATA publikacyju ŚMI nie prakamientavali. Rasijski bok taksama nie adkazaŭ na zapyty vydańniaŭ.
Ciapier čytajuć
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia
Kamientary