Што Польшча і Беларусь хочуць адзін ад аднаго пры вызваленні Пачобута? А Канапацкая вызвалася стаць паручыцелем
Польскі ўрад агучыў свае прапановы за вызваленне Пачобута. Польшча можа зноў адкрыць дадатковыя памежныя пераходы з Беларуссю, якія былі зачыненыя пры партыі «Права і справядлівасць». Аднак Мінск павінен выканаць некалькі ўмоў. Чаго Польшча чакае ад Аляксандра Лукашэнкі, піша Rzeczpospolita.
Паводле крыніц выдання ў польскім урадзе, польскі бок чакае спынення працяглага міграцыйнага крызісу на мяжы, вызвалення журналіста і аднаго з лідараў польскай меншасці ў Беларусі Анджэя Пачобута, а таксама супрацоўніцтва ў справе вызначэння вінаватых у забойстве польскага салдата, сяржанта Матэвуша Сітэка.
— Беларусы ведаюць спіс нашых прыярытэтаў, але, на жаль, ні ў адной з гэтых сфер дагэтуль не адбылося прагрэсу, — кажа суразмоўца.
Выданне сцвярджае, што на стале ў Лукашэнкі ўжо ляжыць прапанова Варшавы.
Калі ўлады ў Мінску супакояць сітуацыю на мяжы і выпусцяць Анджэя Пачобута, — будуць адкрытыя раней закрытыя памежныя пераходы. У Мінску пра гэта ведаюць, — кажа добра праінфармаваны суразмоўца. Іншых падрабязнасцяў ён не раскрывае.
Як мяркуе выданне, гаворка ідзе, верагодна, пра памежны пераход у Баброўніках (Бераставіца), закрыты ў 2023 годзе з прычыны прысуду Пачобуту ў восем гадоў.
Не выключана, што туды ўваходзіць і адкрыццё пераходу ў Кузніцы (Брузгі), які дагэтуль застаецца закрытым для асабовага і таварнага руху. Гэта, безумоўна, палепшыла б гандаль Беларусі з ЕС, піша выданне.
Як даведалася Rzeczpospolita, 25 верасня, у дзень адкрыцця мяжы, у Мінску сабралася камісія, якая займаецца вызваленнем палітычных вязняў.
З адпаведнай просьбай аб вызваленні Анджэя Пачобута да Лукашэнкі звярнулася нядаўна кіраўніца непрызнанага ўладамі Саюза палякаў Беларусі Анжаліка Борыс, якая сама больш за год правяла за кратамі. Ёй дазволілі таксама сустрэцца з журналістам у турме, але далей справа не пайшла.
Ці разглядаецца просьба Борыс у цяперашні час урадавай камісіяй?
— Не маю права выдаваць падрабязнасці, датычныя працы камісіі, — адказала на пытанне Rzeczpospolita член камісіі Ганна Канапацкая.
— Я падтрымліваю ініцыятыву Анжалікі Борыс і гатова быць паручальнікам у справе вызвалення Анджэя Пачобута, — кажа яна.
Канапацкая сцвярджае, што раней яна была паручальніцай вызваленага ў лістападзе мінулага года Рыгора Кастусёва. Лукашэнка вызваліў яго з прычыны цяжкага стану здароўя і дазволіў яму застацца ў Беларусі.
Ці ёсць шанец на хуткае вызваленне Пачобута, чый стан здароўя ўжо доўгі час выклікае сур'ёзныя засцярогі? На гэта пытанне Канапацкая не адказала.
Адна з крыніц у польскім урадзе сказала выданню, што «не хапае ўзаемнага даверу паміж Польшчай і Беларуссю».
— Лукашэнка гэта зацягвае, а між тым такі жэст мала б што яму каштаваў, але мог бы стаць добрай асновай для перамоваў у будучыні, — кажа выданню суразмоўцаў ва ўрадзе. — Прозвішча Пачобута ведаюць і амерыканцы, якія вядуць перамовы з Лукашэнкам аб вызваленні чарговых палітычных вязняў, — дадае ён.
Ён кажа, што Пачобут знаходзіцца на чале «польскага спісу» асоб, за чыё вызваленне змагаецца Варшава. У спісе могуць быць нават некалькі дзясяткаў прозвішчаў, у тым ліку асуджаны на 11 гадоў лагераў ксёндз Генрых Акалатовіч, але таксама затрыманы нядаўна 27‑гадовы польскі кармеліт Гжэгаж Гавел.
Каментары