На працягу больш чым 20 гадоў легінсы былі сімвалам спартыўнай моды і часткай паўсядзённага гардэроба. Але сёння гэтая звыклая рэч паступова здае пазіцыі — на першы план выходзяць шырокія і свабодныя спартыўныя штаны, якія ўсё часцей выбірае маладое пакаленне.
Як піша The Wall Street Journal, папулярнасць легінсаў зрабіла брэнды Lululemon, Alo, Vuori, Beyond Yoga вядомымі і прыбытковымі.
У 2017 годзе нават Музей сучаснага мастацтва ў Нью-Ёрку ўключыў легінсы Lululemon у спіс найважнейшых модных рэчаў.
У красавіку кампанія Edited, якая спецыялізуецца на аналізе моднага рынку з дапамогай штучнага інтэлекту, апублікавала даклад з красамоўнай назвай «Смерць легінсаў?». У ім адзначаецца, што продажы гэтай катэгорыі адзення ўжо некалькі гадоў паслядоўна зніжаюцца.
Калі ў 2022 годзе на легінсы прыпадала 46,9% продажаў, то ў 2025-м ужо 38,7%. Сам Lululemon прагназуе рост усяго на 5—7% у параўнанні з 10% у мінулым годзе.
Пакаленне Z робіць стаўку на свабоду і камфорт. Маладыя людзі ахвотней апранаюць лёгкія, шырокія спартыўныя штаны (Big Workout Pant), якія нагадваюць модныя вобразы 1990-х.
«Дзяўчына, якая не дэманструе цела ў абцягнутым адзенні, а хавае яго пад свабоднымі штанамі, выглядае больш цікавай і стыльнай», — адзначаюць дызайнеры спартыўнага адзення.
Ад танцполу да фітнэс-клубаў
Вобраз вялікіх спартыўных штаноў мае карані ў танцавальнай культуры 1990-х, калі так апраналіся спявачкі і танцоркі, напрыклад, у кліпах R&B і хіп-хоп гуртоў. Сёння гэтую эстэтыку перанялі фітнэс-студыі і ёга-клубы.
Як жанчыны, так і мужчыны на занятках апранутыя як танцоры 1990-х у малюсенькія топы і свабодныя, лёгкія штаны-парашуты.
Настаўнікі танцаў і ёгі кажуць, што шырокія штаны дазваляюць рухацца свабодна, не ствараючы дыскамфорту, які часта ўзнікае ў абцягваючых легінсах.
Некаторыя нават называюць іх «штаны для стойкі на руках» — настолькі зручнымі яны павінны быць для любых рухаў.
Калі яшчэ некалькі гадоў таму легінсы былі ледзь не ўніверсальнай формай для заняткаў спортам і штодзённага жыцця, то цяпер яны ўсё часцей асацыююцца з мінулай эпохай. Для маладога пакалення гэта прыкмета старой моды, якая паступова адыходзіць.
Як жартуюць інструктары: «Калі ты носіш легінсы — ты ўжо выглядаеш як бумер».
Цяпер чытаюць
«Набірала ваду з унітазнага бачка для гатавання, мыцця». Ганна Бонд шчыра распавяла пра цяжкае дзяцінства6
Каментары