Кітайская абаронная кампанія Kestrel Defense прэзентавала новы тып баявога экзашкілета, прызначанага для павышэння эфектыўнасці вайскоўцаў, што кіруюць дронамі і высокатэхналагічнымі сістэмамі на полі бою.
Як паведамляе Defence blog, у кітайскіх сацыяльных сетках з'явіліся першыя фоты новай распрацоўкі кітайскіх вайсковых інжынераў — экзашкілета з інтэграванай падтрымкай для запуску і кіравання малымі беспілотнымі лятальнымі апаратамі.
Сістэма распрацаваная спецыяльна для аператараў дронаў, артылерыйскіх падраздзяленняў і груп разведкі. Яна забяспечвае дадатковую фізічную падтрымку байца падчас працяглых аперацый, павышае цягавітасць і дазваляе вытрымліваць большыя нагрузкі.
Спецыяльныя шарнірныя апоры для рук і ног даюць магчымасць даўжэйшы час стаяць на кукішках або каленях, што асабліва карысна пры дыстанцыйным кіраванні дронамі.
На спіне экзашкілета размешчаны модульны ранец, у якім захоўваецца крыніца сілкавання і, напэўна, абсталяванне для перадачы даных. На шлеме замацаваная сістэма візуалізацыі: у яе ўваходзіць дысплей і візар з дапоўненай рэальнасцю. Гэтыя сродкі забяспечваюць аператару агляд поля бою ў рэжыме рэальнага часу і інтэгруюць відэастрым з беспілотніка.
Лёгкі каркас касцюма і рухомыя злучэнні дазваляюць салдату свабодна перасоўвацца, адначасова несучы дадатковыя прыборы ці зброю. У інфармацыйных матэрыялах кампаніі гаворыцца, што экзашкілет можа працаваць у звязцы з разведвальнымі дронамі і квадракоптарамі.
Дакладныя тэхнічныя характарыстыкі новай кітайскай распрацоўкі пакуль не апублікаваныя. Калі яна сапраўды гатовая да запуску ў вытворчасць, то гэта азначае істотную навінку кітайскіх вайсковых інжынераў.
Якія экзашкілеты для вайскоўцаў выпускаюцца ў свеце
Апошнія гады рапрацоўкай экзашкілетаў для патрэбаў арміі займаюцца навукоўцы шэрагу краін. Аднак гаварыць пра паспяховасць пакуль не даводзіцца.
У ЗША з 2013 года вяліся работы над праектам TALOS (Tactical Assault Light Operator Suit) — баявога экзашкілета для спецназа. Планавалася, што гэты касцюм будзе абсталяваны модулямі сувязі, навігацыі, сістэмай маніторынгу стану байца, а таксама інавацыйнай абаронай — «вадкай керамічнай бранёй», у аснове якой — наначасціцы і валокны з кеўлару.
У 2019 годзе праект быў афіцыйна завершаны, бо прызналі, што рэалізаваць яго згодна з першапачатковай задумай немагчыма пры сучасным або бліжэйшым узроўні тэхналогій. Тым не менш, распрацоўка TALOS істотна паскорыла стварэнне шэрагу перадавых кампанентаў, якія ўжо знайшлі прымяненне ў іншых абаронных праграмах.
Не былі камерцыялізаваныя і іншыя распрацоўкі, прызначаныя для вайскоўцаў, такія, як экзашкілеты для ніжніх канцавін BLEEX ці ONIX, а таксама экзашкілет з гідраўлічным прывадам, прызначаны, каб насіць грузы HULC.
У Расіі вядзецца распрацоўка сістэмы баявой экіпіроўкі новага пакалення з актыўным экзашкілетам «Легіянер». Яна прызначаная для зніжэння нагрузкі на апорна-рухальны апарат вайскоўца і паляпшэння яго фізічнай вынослівасці. Некалькі гадоў таму пісалі, што яна можа з'явіцца ў гэтым годзе.
Як адзначаюць эксперты, да гэтай пары яшчэ ніводзін экзашкілет не з'явіўся на полі бою. Пры ўсіх сваіх перавагах яны дорага каштуюць, яны складаныя ў абслугоўванні, патрабуюць спецыяльнай падрыхтоўкі і навучання аператараў.
Да таго ж яны істотна абмяжоўваюць дзеянні байца. Калі ў грамадзянскай сферы з гэтым можна змірыцца і пайсці на кампрамісы, то на фронце, дзе важная кожная секунда, гэта недапушчальна.
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам13
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2020
Каментары