«Дзе яны працуюць?» Камуніст Сыранкоў будзе скардзіцца ў пракуратуру і падатковую на Бондараву і кампанію

Сяргей Сыранкоў удзельнічае ў кампаніі выключна для масавасці і стварэння бачнасці альтэрнатывы. Кандыдат ад камуністаў не хавае, што не збіраецца змагацца за пасаду прэзідэнта. Ва ўсіх сваіх выступах ён сцвярджае, што пераможа абавязкова Лукашэнка. Ён жа пайшоў на выбары, каб «прапагандаваць камуністычныя ідэі» і піярыць кішэнную партыю.

Статус кандыдата падарыў Сыранкову гадзіну эфірнага часу на тэлеканале «Беларусь 1». Частку свайго другога выступу ён прысвяціў пагрозам на адрас былой сяброўкі Кампартыі даносчыцы Вольгі Бондаравай і «моўнага інспектара» Ігара Случака. Сыранкоў, вядома, не называў імёнаў, але і без іх зразумела, пра каго ідзе гаворка.

Лідар камуністаў пачаў з таго, што моўнае пытанне ніколі ў Беларусі не стаяла, аднак апошнім часам актывізаваліся блогеры, якія спрабуюць унесці дэструктыў.

«У апошнія некалькі гадоў, як па пстрыканні пальцаў з-за мяжы, актывізаваліся так званыя «моўныя» і «языковые» інспектары. Ці бачыце, адным недастаткова надпісаў толькі па-руску, а іншым — па-беларуску. Гэтыя дзеячы пачынаюць спрабаваць нацкоўваць грамадства на моўнай глебе. Закідаць установы і прадпрыемствы краіны сваімі паклёпамі і зваротамі. Маўляў, напісана па-беларуску — не разумею. Або напісана па-руску — а дзе ж пераклад?» — кажа Сыранкоў.

У гэтых архетыпічных апісаннях угадваюцца «моўны інспектар» Ігар Случак, які многія гады ў перапісках з чыноўнікамі і прадпрыемствамі змагаецца за распаўсюд беларускай мовы, і Вольга Бондарава, якая патрабуе перакладаць усё на рускую мову і завальвае зваротамі дзяржорганы. 

Сыранкоў абураны, што актывісты «цэлымі днямі бамбяць дзясяткі паведамленняў і абурэнняў па адным і тым жа пытанні» і нават «закідаюць зваротамі замежныя амбасады». Камуніст заклікае разабрацца з гэтымі фактамі і задае пытанне, напэўна балючае для адной беспрацоўнай даносчыцы-студэнткі.

«Дзе працуюць гэтыя інспектары, якія публікуюць пастоў на дзень больш, чым інфармацыйныя агенцтвы? Адкуль у іх столькі вольнага часу? Складваецца ўражанне, што яны даўно знаходзяцца на заробку з-за мяжы і робяць гэта прафесійна», — выстаўляе гіпотэзу Сыранкоў.

Затым ён нават перайшоў на беларускую мову: адзначыў, што абедзве мовы лічыць роднымі, добра іх разумее, і яму не трэба, каб дзяржава выдаткоўвала грошы на дубляванне ўсіх надпісаў на дзвюх мовах.

«Мы не аддамо нашу родную беларускую мову буржуазным нацыяналістам, нацдэмам і нацыкам. И не отдадим наш русский язык великодержавным шовинистам, власовцам и имперцам», — заявіў Сыранкоў.

Напрыканцы ён паабяцаў, што Кампартыя паскардзіцца на актывістаў у пракуратуру, Следчы камітэт і іншыя профільныя ведамствы. А таксама ў падатковую: каб там высветлілі, за чый кошт жывуць «моўныя інспектары».

Гэта не першы наезд Кампартыі на Бондараву і яе паплечніц. Нядаўна ў тэлеграм-канале партыі гродзенскую даносчыцу высмеялі і абвінавацілі ў шавінізме. Усё з-за яе абурэння беларускамоўнымі бюлетэнямі на выбарах. 

Бондарава, нагадаем, раней была сяброўкай Кампартыі і сакратаром партыйнай газеты. Але мінулым летам даносчыцу адусюль прагналі: яе бурнай дзейнасці не вытрымалі нават праўладныя камуністы. З тых часоў Кампартыя і Бондарава сістэматычна абменьваюцца ўзаемнымі абвінавачваннямі і папрокамі.

• 6
• 0
• 50
• 4
• 1
• 0
• 2
• 0