«Dzie jany pracujuć?» Kamunist Syrankoŭ budzie skardzicca ŭ prakuraturu i padatkovuju na Bondaravu i kampaniju

Siarhiej Syrankoŭ udzielničaje ŭ kampanii vyklučna dla masavaści i stvareńnia bačnaści alternatyvy. Kandydat ad kamunistaŭ nie chavaje, što nie źbirajecca zmahacca za pasadu prezidenta. Va ŭsich svaich vystupach jon śćviardžaje, što pieramoža abaviazkova Łukašenka. Jon ža pajšoŭ na vybary, kab «prapahandavać kamunistyčnyja idei» i pijaryć kišennuju partyju.

Status kandydata padaryŭ Syrankovu hadzinu efirnaha času na telekanale «Biełaruś 1». Častku svajho druhoha vystupu jon pryśviaciŭ pahrozam na adras byłoj siabroŭki Kampartyi danosčycy Volhi Bondaravaj i «moŭnaha inśpiektara» Ihara Słučaka. Syrankoŭ, viadoma, nie nazyvaŭ imionaŭ, ale i bieź ich zrazumieła, pra kaho idzie havorka.

Lidar kamunistaŭ pačaŭ z taho, što moŭnaje pytańnie nikoli ŭ Biełarusi nie stajała, adnak apošnim časam aktyvizavalisia błohiery, jakija sprabujuć unieści destruktyŭ.

«U apošnija niekalki hadoŭ, jak pa pstrykańni palcaŭ z-za miažy, aktyvizavalisia tak zvanyja «moŭnyja» i «jazykovyje» inśpiektary. Ci bačycie, adnym niedastatkova nadpisaŭ tolki pa-rusku, a inšym — pa-biełarusku. Hetyja dziejačy pačynajuć sprabavać nackoŭvać hramadstva na moŭnaj hlebie. Zakidać ustanovy i pradpryjemstvy krainy svaimi paklopami i zvarotami. Maŭlaŭ, napisana pa-biełarusku — nie razumieju. Abo napisana pa-rusku — a dzie ž pierakład?» — kaža Syrankoŭ.

U hetych archietypičnych apisańniach uhadvajucca «moŭny inśpiektar» Ihar Słučak, jaki mnohija hady ŭ pierapiskach z čynoŭnikami i pradpryjemstvami zmahajecca za raspaŭsiud biełaruskaj movy, i Volha Bondarava, jakaja patrabuje pierakładać usio na ruskuju movu i zavalvaje zvarotami dziaržorhany. 

Syrankoŭ aburany, što aktyvisty «cełymi dniami bambiać dziasiatki paviedamleńniaŭ i abureńniaŭ pa adnym i tym ža pytańni» i navat «zakidajuć zvarotami zamiežnyja ambasady». Kamunist zaklikaje razabracca z hetymi faktami i zadaje pytańnie, napeŭna balučaje dla adnoj biespracoŭnaj danosčycy-studentki.

«Dzie pracujuć hetyja inśpiektary, jakija publikujuć pastoŭ na dzień bolš, čym infarmacyjnyja ahienctvy? Adkul u ich stolki volnaha času? Składvajecca ŭražańnie, što jany daŭno znachodziacca na zarobku z-za miažy i robiać heta prafiesijna», — vystaŭlaje hipotezu Syrankoŭ.

Zatym jon navat pierajšoŭ na biełaruskuju movu: adznačyŭ, što abiedźvie movy ličyć rodnymi, dobra ich razumieje, i jamu nie treba, kab dziaržava vydatkoŭvała hrošy na dublavańnie ŭsich nadpisaŭ na dźviuch movach.

«My nie addamo našu rodnuju biełaruskuju movu buržuaznym nacyjanalistam, nacdemam i nacykam. I nie otdadim naš russkij jazyk vielikodieržavnym šovinistam, vłasovcam i impiercam», — zajaviŭ Syrankoŭ.

Naprykancy jon paabiacaŭ, što Kampartyja paskardzicca na aktyvistaŭ u prakuraturu, Śledčy kamitet i inšyja profilnyja viedamstvy. A taksama ŭ padatkovuju: kab tam vyśvietlili, za čyj košt žyvuć «moŭnyja inśpiektary».

Heta nie pieršy najezd Kampartyi na Bondaravu i jaje paplečnic. Niadaŭna ŭ telehram-kanale partyi hrodzienskuju danosčycu vyśmiejali i abvinavacili ŭ šaviniźmie. Usio z-za jaje abureńnia biełaruskamoŭnymi biuleteniami na vybarach. 

Bondarava, nahadajem, raniej była siabroŭkaj Kampartyi i sakratarom partyjnaj haziety. Ale minułym letam danosčycu adusiul prahnali: jaje burnaj dziejnaści nie vytrymali navat praŭładnyja kamunisty. Z tych časoŭ Kampartyja i Bondarava sistematyčna abmieńvajucca ŭzajemnymi abvinavačvańniami i paprokami.

• 6
• 0
• 50
• 4
• 1
• 0
• 2
• 0