Сталі вядомыя прозвішчы пяці палітвязняў, вызваленых па памілаванні пасля 7 лістапада
7 лістапада ўлады выпусцілі па памілаванні яшчэ 31 палітвязня. Іх імёны не паведамляліся афіцыйна.
Цяпер Юрый Васкрасенскі на стрыме ў Азаронка агучыў імёны некаторых з іх. Гэта Аляксандр Бойка, Аляксей Ярашэвіч, Кацярына Шаблінская-Іванова, Эдуард Ісаеў, Белямук (з такім прозвішчам ёсць два палітвязні, Дзмітрый і Яўген, невядома, хто з іх на свабодзе).
Аляксандр Бойка быў затрыманы летась. У прымусовым відэа сілавікоў ён казаў, што зняў відэа з вайсковай тэхнікай і выклаў гэта ў тэлеграм-чат. Бойку абвінавацілі паводле ч. 1 арт. 361-4 КК (садзейнічанне экстрэмісцкай дзейнасці) і асудзілі на 2,5 года пазбаўлення волі.
Аляксею Ярашэвічу далі 2 гады хіміі па абвінавачанні ў абразе Лукашэнкі (ч. 1 арт. 368 КК).
Адразу тры артыкулы інкрымінавалі Кацярыне Шаблінскай-Івановай — арт. 130 (распальванне іншай сацыяльнай варожасці), ч. 3 арт. 361 (заклікі да санкцый), арт. 342 (актыўны ўдзел у групавых дзеяннях, груба парушаючых грамадскі парадак).
Эдуард Ісаеў быў працаўніком «Гродна Азота». Яго затрымалі ў 2022-м і прысудзілі 3,5 года калоніі. Мужчыну абвінавацілі ў абразе Лукашэнкі і паклёпе на яго (арт. 368 і 367 КК).
З ліпеня па лістапад пасля ўказаў Лукашэнкі на волю выйшлі 146 чалавек.
Сярод вызваленых па памілаванні ў лістападзе 29 мужчын і 2 жанчыны. Паведамлялася, што 17 палітвязняў, якіх закранула памілаванне, маюць хранічныя захворванні, трое маюць інваліднасць. 27 чалавек маюць дзяцей, 7 — шматдзетныя бацькі.
Цяпер чытаюць
«Стрэльба калі і стрэліць, то наўрад ці кулямётнай чаргой». Максім Знак ацаніў рэальнасць пагроз беларускай прапаганды пазбавіць грамадзянства палітэмігрантаў99
Каментары