«Каб прымусіць Расію да справядлівага міру». Зяленскі патлумачыў украінскі наступ на Курскую вобласць
Пра гэта прэзідэнт Украіны распавёў у інтэрв'ю прадстаўнікам індыйскіх СМІ, паведамляе інфармацыйнае агентства УНІАН.
Адказваючы на пытанне аб Курскай аперацыі, ён зазначыў, што гэта «частка вялікай ваенна-палітычнай, ваенна-дыпламатычнай аперацыі».
«Усё, што мы робім, робіцца толькі для таго, каб прымусіць Расію быць гатовымі да справядлівага міру. Курская аперацыя не дазволіла ім захапіць нашу Сумшчыну і аслабіць нашы пазіцыі, і ўзмацніць іх пазіцыі зноў», — сказаў Зяленскі.
Ён дадаў, што Украіне было вельмі цяжка без дапамогі партнёраў доўгі час.
«І нам было вельмі складана перахапіць ініцыятыву. І нам гэта трэба было зрабіць. І гэта адзін з этапаў гэтай задумы. І вы яго ўбачылі. Ён спрацаваў. Але ён спрацаваў менавіта для таго, для чаго я кажу. Да канца ўсе мэты гэтых нашых крокаў я не магу вам расказаць. Калі ўсё скончыцца, калі ў нас атрымаецца, стане відавочным, для чаго і што мы рабілі», — адзначыў кіраўнік дзяржавы.
Таксама на пытанне аб тым, якім можа быць шлях да міру, Зяленскі адзначыў:
«Лічу, што наш падыход, калі мы гаворым аб нашых кроках, як на полі бою, так і ў дыпламатычным напрамку, — наш падыход бліжэйшы да міру, чым любыя іншыя прапановы».
Ён дадаў, што гэты шлях вельмі складаны, і ўжо былі пачуты прапановы ад многіх краін свету.
«Я лічу, што на сёння ўсё тое, што гучыць, — пакуль што гэта палітычныя заявы. Гэта не шлях. Гэта не формулы якія-небудзь. Гэта ніякая не канкрэтыка», — сказаў кіраўнік Украіны і адзначыў, што «няма ні ў каго ніякага плана».
Зяленскі таксама адзначыў, што прэзідэнт Расіі Уладзімір Пуцін не баіцца «палітычных запалохванняў», а на дыпламатычныя крокі ён адказвае чарговымі ўдарамі па Украіне і забойствамі ўкраінцаў.
«Калі вы кажаце «дыпламатыя», — я толькі «за». Толькі дыпламатыю — я б хацеў убачыць канкрэтныя крокі і каб гэта было не за кошт 30% нашай дзяржавы і не за кошт нашага насельніцтва. Калі ёсць такі план, — мы толькі «за», — сказаў Зяленскі.
Ён таксама зазначыў, што Пуцін хоча вярнуць уплыў, які быў у Савецкага Саюза, але ён гэтага не зробіць.
«Ён ужо не паспее… Яму ўжо не дадуць ні гады, ні свет… Ужо ўкраінскае войска маленькай колькасцю заходзіць у яго вобласць і ён нічога не можа зрабіць 20 дзён», — адзначыў прэзідэнт і дадаў, што Пуцін «ужо не гулец».
Акрамя таго, на пытанне адносна будучыні Саміта міру Зяленскі выказаў меркаванне, што ён павінен прайсці, пажадана, у адной з краін Глабальнага поўдня.
«Ёсць краіны такія як Саудаўская Аравія і Катар, і такія краіны як Турцыя, і Швейцарыя таксама (але гэта іншы напрамак), але, зрэшты, з якімі мы вядзём перагаворы адносна другога Саміт міру», — сказаў ён.
Кіраўнік дзяржавы дадаў, што ён падзяліўся з прэм'ер-міністрам Індыі Нарэндрам Модзі меркаваннем аб магчымасці правядзення Саміта ў гэтай краіне.
«Але я хачу быць шчырым. Гэта тычыцца не толькі Індыі, а любой дзяржавы, якая станоўча ставілася б да прыняцця другога Саміту. Мы не зможам правесці Саміт міру ў краіне, якая пакуль не далучылася да камюніке Саміту міру. Я думаю, вы гэта разумееце. Ніхто ні на каго не цісне, але гэта лагічна», — адзначыў Зяленскі.
Цяпер чытаюць
Учора Мінск зноў затапіла. Чаму сталіца не гатовая да дажджоў?4
Каментары