Сэкс-вымагальніцтва: інстаграм выдаліў дзясяткі тысяч уліковых запісаў
Meta правяла маштабную кампанію супраць нігерыйскіх махляроў, звязаных з групай Yahoo Boys.
24 ліпеня кампанія Meta абвясціла аб тым, што выдаліла каля 63 тысяч уліковых запісаў інстаграма ў Нігерыі, якія спрабавалі выкарыстоўваць махлярскія схемы фінансавага сэкс-шантажу. Сярод выдаленых — скаардынаваная сетка з прыкладна 2500 акаўнтаў, якую спецыялісты кампаніі звязалі з групай з прыкладна 20 чалавек, якія ў першую чаргу былі нацэленыя на дарослых мужчын у ЗША.
Акрамя гэтага, як паведаміла кампанія, было выдалена 1300 уліковых запісаў, 5700 груп і 200 старонак у Facebook. Яны выкарыстоўваліся для арганізацыі, вярбоўкі і навучання новых махляроў. Сярод прапаноў, напрыклад, скрыпты і інструкцыі, якія можна выкарыстаць для ашуканства людзей, ці спасылкі на калекцыі фотаздымкаў для запаўнення фэйкавых акаўнтаў.
Па меркаванні кампаніі, уліковыя запісы ў інстаграм і фэйсбуку былі звязаныя з нігерыйскай сеткай кіберзлачынцаў, вядомай як Yahoo Boys. Яе ўдзельнікі выкарыстоўваюць розныя метады вымагання. Адным з найбольш вядомых з'яўляецца сэкс-вымагальніцтва на шырокую нагу і на міжнародным узроўні.
Махляры спачатку ўступаюць у перапіску з патэнцыйнай ахвярай, а потым просяць яе падзяліцца інтымнымі фотаздымкамі. Пасля атрымання «кампраметуючай» выявы адпраўніка пачынаюць шантажаваць, пагражаючы апублічваннем здымку. Каб гэтага не адбылося, неабходна заплаціць.
Кампанія Meta адзначае, што лічыць сэкс-вымагальніцтва жахлівым злачынствам, якое можа мець разбуральныя наступствы.
Кампанія таксама звяртае ўвагу на распрацаваныя яе спецыялістамі новыя позначкі, якімі мецяць патэнцыйна небяспечныя акаўнты, і прапануюць крокі, каб перашкодзіць ім знаходзіць карыстальнікаў і ўзаемадзейнічаць з імі.
Акрамя гэтага, Meta пачала тэставаць новую функцыю абароны ад аголенасці ў інстаграме. Яна будзе аўтаматычна размываць выявы з такім зместам, а таксама папярэджваць карыстальнікаў пра магчымыя наступствы пры адпраўцы далікатных выяў і накіроўваць да парадаў і рэсурсаў па бяспецы.
Разам з тым Meta звяртае ўвагу на тое, што пераважная колькасць выдаленых уліковых запісаў была арыентаваная на дарослых. Пры гэтым большасць спроб вымагальніцтва з дапамогай гэтых акаўнтаў поспеху не мела.
Цяпер чытаюць
Мінчук чатыры гады трымаў у рабстве пенсіянераў і прымушаў іх прасіць міласціну. Яны ўжо памерлі8
Каментары