Пісьменнік Саша Філіпенка распавёў пра цяперашні стан бацькі і падрабязнасці яго затрымання
«Падтрымлівае сваіх сукамернікаў, заўсёды жартуе».
Бацьку беларускага пісьменніка Сашы Філіпенкі нядаўна затрымалі сілавікі і на 13 сутак змясцілі на Акрэсціна — фармальна за рэпост з «Люстэрка», але фактычна за публічную дзейнасць сына.
Філіпенка расказаў выданню Tages-Anzeiger, што ў яго зараз няма непасрэднай сувязі з бацькам, але днямі пісьменніку патэлефанаваў адзін з ягоных сукамернікаў, які ўжо вызваліўся, і распавёў падрабязней пра ягоны цяперашні стан.
«Аднойчы патэлефанаваў мужчына, які сядзеў з маім бацькам у адной камеры і цяпер ужо на волі. Ён сказаў, што мой бацька вельмі адважны, што ён падбадзёрваў і падтрымліваў сваіх сукамернікаў, заўсёды жартаваў. Мужчына таксама сказаў, што бацька моцна непакоіцца за нас з мамай, цікавіцца, як нашы справы. Я вельмі ганаруся ім і ведаю, што ён таксама мной моцна ганарыцца»,
— падзяліўся апошняй інфармацыяй Саша Філіпенка з выданнем Tages-Anzeiger.
Пісьменнік таксама распавёў пра тое, як менавіта праходзіла затрыманне бацькі. Ён адзначыў, што канфіскаваны сілавікамі тэлефон яго мамы пасля ператрусу ўсё яшчэ бачны ў анлайне.
«Узброеныя людзі ўварваліся ў кватэру да маіх бацькоў і загадалі ім легчы на падлогу, надзелі на іх кайданкі. Майму бацьку 62 гады, а маці — 60. Занадта жорстка, улічваючы, што мае бацькі ніяк не маглі нашкодзіць васьмі сілавікам са зброяй.
Мае бацькі не маглі мне патэлефанаваць, бо ўсе тэлефоны забралі. Я падтрымліваў сувязь з мамай праз суседзяў і маю бабулю. Канфіскаваны тэлефон мамы, дарэчы, усё яшчэ можна ўбачыць у анлайне», — дадаў Філіпенка.
Нагадаем, што Саша Філіпенка — вядомы беларускі пісьменнік, журналіст і публіцыст. Аўтар кніг «Былы сын», «Крэмулятар», «Чырвоны Крыж», «Вяртанне ў астрог», «Цкаванне». Ягоныя раманы перакладзеныя на многія мовы. Філіпенка рэзка крытыкуе ўлады Беларусі і Расіі.
З 2004 да 2020 года жыў у Расіі, дзе працаваў у незалежных СМІ.
Улетку 2023 года ў Вільні была пастаўлена яго п'еса «Ціхары» пра падзеі ў Беларусі ў 2030 годзе. Па сюжэце настаў апакаліпсіс, але нават ён не спыніў палітычных судоў, якія праводзяць у бункеры.
Калега памерлага выкладчыка Шчукіна: Яго кінула жонка з дзецьмі, пачалася дэпрэсія. У выніку звольнілі за прагулы9
Каментары
https://d2accbiqacj5y8.cloudfront.net/ru/330697