Да выбару гардэроба на халодны сезон варта падыходзіць асабліва адказна: калі летам промахі амаль не адчувальныя, у халодную пару няўдалыя адзенне і абутак могуць каштаваць здароўя. Як знайсці ідэальныя чаравікі, якія будуць саграваць?
Пазбягайце гэтых памылак і камфорт вам забяспечаны.
Раніца — не час для шопінгу
Калі праз некаторы час вы прымяраеце свежанабытую пару і не разумееце, чаму яна раптам пачала вам падціскаць, задумайцеся, ці не раніцай праходзіў ваш шопінг. Памер ступні змяняецца на працягу сутак: у першай палове дня, пасля начнога адпачынку, яна меншая, а да вечара злёгку ацякае ад доўгай хады або сядзення. Таму выбіраць абутак лепш пасля абеду.
Калі магчымасці адкласці шопінг няма, абавязкова захавайце чэк і прымерце пару па вяртанні дадому. У выпадку промаху з памерам — аднясіце боты назад у краму.
Абутак «памер у памер»
Яшчэ адна частая памылка — купляць восеньскія чаравікі «памер у памер». Абутак на халодны сезон павінен саграваць нагу, а для захавання цяпла неабходна паветра. Занадта шчыльны абутак яго выцесніць. Акрамя таго, цесныя боты парушаюць кровазварот, што таксама ўплывае на пачуццё холаду.
Пры выбары цёплага абутку важна браць яго на паўпамера-памер больш. Улічвайце, што ў моцныя халады вам могуць спатрэбіцца цёплыя шкарпэткі — месца павінна заставацца і для іх.
Увага на падэшву
Калі на нагах няправільны абутак, мокрае лісце або галалёд могуць стаць сапраўдным выпрабаваннем. Не паслізнуцца дапамогуць чаравікі з рыфленай падэшвай ці падэшвай-пратэктарам. Не забывайце і аб цеплыні: каб мароз не дабраўся да вашых пятак, таўшчыня падэшвы павінна быць не меней за 1-1,5 сантыметра.
Прычынай няўдалых падзенняў можа стаць і абцас. Памятайце, што асенне-зімовы абутак на ім не прадугледжвае доўгіх прагулак — перамяшчацца ў такім лепш на таксі. Але, калі вы не ўяўляеце жыцця без такога абутку, а замест таксі карыстаецеся грамадскі транспартам, аддайце перавагу ўстойлівым мадэлям з абцасам да 5 сантыметраў.
Для тых, хто любіць гарачэйшае
Штучны ўцяпляльнік выдатна спраўляецца з тэмпературай да +3, але з ніжэйшай — дрэнна. Тым, каму важна трымаць ногі ў цяпле, варта звярнуць увагу на ўцяпляльнікі з натуральнага футра. Рэкардсменам па ўтрыманні цяпла з'яўляецца аўчына: паветраная праслойка паміж варсінкамі падтрымлівае патрэбную тэмпературу і не дае нагам змакаць.
Дарэчы, авечай вусцілкай можна апгрэйдзіць і дэмісезонны абутак. Галоўнае — не забываць час ад часу яе даставаць і добранька прасушваць.
Не толькі скура
Сучасныя тэхналогіі дазваляюць атрымліваць скурзам, які па якасці ні ў чым не саступае натуральнай скуры. Хоць і каштуюць такія мадэлі не танна, затое маюць некалькі пераваг перад звычайным скураным абуткам. Напрыклад, скурзам не так пакутуе ад соляў і хімікатаў, якімі багата пасыпаюць вуліцы ў снежны час.
Спадабалася пара з якаснага скурзама? Паглядзіце, з чаго пашыты абутак знутры: да нагі павінны датыкацца натуральныя матэрыялы — скура, мех ці якасны тэкстыль. Калі ўсё добра — чаравікі смела можна купляць.
Дарэчы, беларускія вытворцы падрыхтавалі шмат цікавых мадэляў для гэтай восені. Прапануем паглядзець на самыя стыльныя з іх.
Цяпер чытаюць
У Мінску перасабралі Ракаўскае прадмесце. Там ужо гуляюць, фатаграфуюцца і ядуць14
Каментары