Якія змены прадугледжваюцца новымі генпланамі гарадоў-спадарожнікаў Мінска?
22 мая Лукашэнка сваім указам зацвердзіў новыя генеральныя планы трох гарадоў-спадарожнікаў Мінска: Фаніпаля, Смалявічаў і Рудзенска. Якіх змен зараз чакаць гэтым гарадам, напісала агенцтва «Мінск-Навіны».
Найбольш значныя перамены адбудуцца ў Смалявічах: у параўнанні з ранейшымі планамі цяпер прапануецца павялічыць насельніцтва горада амаль удвая. У той жа час у Фаніпалі глабальных перамен не прадбачыцца, а ў Рудзенску генплан увогуле перагледжаны ў адваротны бок.
Смалявічы
Па ранейшай версіі генплана насельніцтва горада да 2030 года павінна было б скласці 30 тысяч чалавек. Але сёння прапануецца павялічыць колькасць да 50 тысяч чалавек. Пра гэта заявіў намеснік дырэктара «БелНДІП горадабудаўніцтва» Юрый Віннікаў.
«Плануецца, што прыкладна 70% жыхароў змогуць працаваць у Смалявічах у сферы абслугоўвання альбо ў індустрыяльным парку «Вялікі камень», — сказаў ён, заўважыўшы, што толькі 30% жыхароў Смалявічаў будуць ездзіць на працу ў Мінск.
Рудзенск
Раней стаяла задача павялічыць плошчу горада з 0,4 да 2,4 тысячы га, насельніцтва — з 11,5 да 81 тысячы чалавек. Паводле новага генплана насельніцтва горада-спадарожніка складзе, аднак, толькі 41 тысячу чалавек.
«Ёсць агульныя лічбы планаванага насельніцтва па ўсіх спадарожніках сталіцы — гэта 120 тысяч чалавек. Іх трэба раўнамерна размеркаваць па шасці гарадах», — растлумачыў логіку гэтага рашэння Віннікаў.
Распрацоўшчыкі генпланаў у 2014-м прымалі таксама пад увагу абмежаванні для развіцця некаторых гарадоў. Напрыклад, Смалявічам пад забудову патрэбныя былі дадатковыя землі. Як адзначыў Віннікаў, яны вакол горада высакабальныя сельскагаспадарчыя, на іх засваенне была строгая забарона. Таму для гэтага спадарожніка заклалі лічбы меншыя, чым хацелася б.
«А вакол Рудзенска размешчаныя самыя нізкабальныя землі. Мы разлічвалі, што іх будзе прасцей далучыць да горада. Значыць, з'явіцца прыстойны тэрытарыяльны рэзерв для развіцця, а з ім — і для павелічэння насельніцтва», — лічыць спецыяліст.
Аднак аказалася, што ў цэлым Рудзенск — горад больш складаны для засваення. Ён і далей ад Мінска, і прыродныя ўмовы там спецыфічныя. Таму план развіцця быў перагледжаны.
Фаніпаль
Глабальных перамен у гэтым горадзе-спадарожніку Мінска чакаць не варта. Гаворка ідзе толькі пра аптымізацыю ранейшага генплана.
«Калі раней мы істотна змянялі параметры горада, то цяпер палічылі, што такія грунтоўныя перамены не патрабуюцца. Таму што тэрыторыі для асваення і развіцця абмежаваныя, — расказаў Юрый Віннікаў. — Гарадская забудова размешчаная паміж аўтадарогай Р-1 і чыгункай, да якой з другога боку прымыкае прамысловая зона. Развіццё горада-спадарожніка ў бок Мінска таксама праблематычна ў сувязі з наяўнасцю радовішчаў будаўнічых матэрыялаў (пяску, гліны)».
Аднак па новым генплане Фаніпаль усё ж «прырасце» з 17,5 да 29 тысяч чалавек. Плошча горада павялічыцца пераважна на паўднёвай ускраіне за кошт далучэння сельскагаспадарчых зямель.
Арыштаваны дырэктар Палаца Рэспублікі, адзін з арганізатараў Марафона адзінства9
Каментары