Правядзенне службаў у касцёлах Гродзеншчыны на польскай мове чыноўнікі назвалі незаконным
Падчас сустрэчы 28 лютага кіраўніцтва Іўеўскага раёна са святарамі па пытаннях «развіцця этнаканфесійнай сферы» акцэнт зрабілі на праблемных пытаннях, паведаміла газета райвыканкама. Адной з такіх праблем было названа правядзенне ў каталіцкіх парафіях святой імшы на польскай мове.
«Праблемным застаецца выкарыстанне польскай мовы падчас службаў у каталіцкіх храмах раёна, што недапушчальна згодна з Законам Рэспублікі Беларусь «Аб мовах у Рэспубліцы Беларусь», — прыводзіць выданне словы загадчыцы сектара ідэалагічнай работы і па справах моладзі Вольгі Барко.
«Правядзенне святой імшы на польскай мове ў каталіцкіх парафіях Беларусі, асабліва на захадзе краіны, — традыцыя, якая склалася гістарычна. У касцёлах службы праходзяць як на беларускай, так і на польскай мовах — для прадстаўнікоў польскай дыяспары і для тых, хто з дзяцінства прывык маліцца па-польску.
Напрыклад, у Іўеўскім касцёле ў нядзелю дзве ранішнія нядзельныя службы праходзяць на польскай мове (як правіла, з раніцы ў храмы прыходзіць больш старэйшых людзей), а ў абед (для дзяцей і маладых бацькоў) і ўвечары (для моладзі) — на беларускай мове», — адрэагаваў на заявы чыноўнікаў katolik.life.
Паводле інфармацыі рэсурсу, у касцёлах Беларусі часта праводзяць службы не толькі па-польску, але і па-англійску — для студэнтаў з Азіі і Афрыкі.
«З іншага боку, самі католікі дыскутуюць пра тое, наколькі прапарцыянальна правядзенне святой імшы па-польску і па-беларуску ў заходняй частцы краіны. Але гэта — пытанні саміх парафій і дыяцэзій, дзе кіруюцца пажаданнямі вернікаў», — піша katolik.life.
Герой Беларусі Марына Васілеўская нарадзіла дачку ад касманаўта Алега Навіцкага16
Каментары