На фоне сустрэчы Лукашэнкі ў Пуціна сілавыя структуры Беларусі пераведзеныя ва ўзмоцнены рэжым нясення службы. Што адбываецца?
Як стала вядома «Нашай Ніве», адныя вучэнні змяняюць іншыя. Супрацоўнікаў Міністэрства па надзвычайных сітуацыях перасталі адпускаць у адпачынкі. А ў войску пайшлі чуткі, што Масква хоча, каб расійскіх мабілізаваных школілі ў Беларусі.
«Амаль усе сілавыя структуры пераведзеныя ва ўзмоцнены рэжым нясення службы, нават Следчы камітэт і Міністэрства па надзвычайных сітуацыях. Адныя вучэнні змяняюць іншыя, — расказаў «Нашай Ніве» афіцэр адной з сілавых структур. — Увесь час падымаюць па трывозе, правяраюць гатоўнасці, трывожныя чамаданчыкі
(сумка з першым неабходным на выпадак выбыцця: бялізна, тушонка, мыючыя сродкі, компас, курвіметр, мапы). КДБ «мініруе» будынкі, а мянты і МНС ездзяць «размініраваць».
Супрацоўнікаў Міністэрства па надзвычайных сітуацыях перасталі адпускаць у адпачынкі вусным распараджэннем», — сказаў «Нашай Ніве» афіцэр міліцыі.
«У нас «узмацненне». Ведаю, што і спецпадраздзяленні ўсіх структур па рэспубліцы не вылазяць з вучэнняў і, увогуле, нервовы народ стаў з мабілізацыяй гэтай», — сказаў сілавік з іншага рэгіёна.
На нізавым узроўні ў сілавых структурах не разумеюць, што азначала паездка Аляксандра Лукашэнкі ў Сочы і яго затрымка там на тры дні без ніякіх публічных выступаў.
Суразмоўцы «Нашай Нівы» звяртаюць увагу на падабенства юрыдычных працэсаў, якія цяпер адбываюцца ў краіне, з працэсамі напярэдадні 2020-га, а канкрэтна: выдаюцца засакрэчаныя прававыя акты, змест якіх асабоваму складу сілавых структур пакуль не даводзяць.
У 2020-м так рыхтавалі, напрыклад, юрыдычнае абгрунтаванне для ўвядзення ў гарады сілаў спецыяльных аперацый, якія ўдзельнічалі ў выніку ў разгоне мірных дэманстрантаў.
«Цяпер у некаторых часцях Беларусі абвяшчаецца праверка баявой і мабілізацыйнай гатоўнасці. Ёсць падставы лічыць, што гэта закране не толькі часць у Мачулішчах, пра якую абвесцілі афіцыйна», — сказаў «Нашай Ніве» высокапастаўлены вайсковец.
Мачулішчы — гэта найбольшы грузавы аэрадром пад Мінскам, транспартны хаб для расійскіх войскаў у першыя месяцы вайны ва Украіне.
«Па маёй інфармацыі, ідзе падрыхтоўка для прыняцця расійскіх мабілізаваных на беларускіх палігонах, вучэбных цэнтрах і вайсковых часцях. У нас ёсць і месцы для трэніровак, і інструктары. Магчыма, Расія патрабуе ад Лукашэнкі, каб навучанне часткі мабілізаваных расійскіх вайскоўцаў праходзіла ў Беларусі і праводзілі яго беларускія сілавікі», — выказвае меркаванне суразмоўца «Нашай Нівы».
Учора Мінск зноў затапіла. Чаму сталіца не гатовая да дажджоў?4
Каментары