Ціханоўская ў Віцебску. На сустрэчу сабраліся 8000 чалавек ВІДЭА
Кандыдат у прэзідэнты Святлана Ціханоўская працягвае ездзіць па краіне і выступаць на мітынгах. Пасля фенаменальных сустрэч з выбаршчыкамі ў Глыбокім і Наваполацку аб'яднаны штаб альтэрнатыўнага кандыдата дабраўся да Віцебска. І ў абласным цэнтры ў парк, дзе ўлады дазволілі сустрэчу, прыйшлі тысячы людзей. Карэспандэнт «Нашай Нівы» ацаніў колькасць прысутных у 8 тысяч. Такога мітынгу ў Віцебску яшчэ не бывала ў найноўшай гісторыі.
Чытайце таксама: Эмацыйны мітынг з удзелам Ціханоўскай у Віцебску ФОТАРЭПАРТАЖ
Вядучы пачаў свой выступ па-беларуску, але пазней перайшоў на рускую мову.
«Верым, можам, пераможам!» — падбадзёрвае вядучы людзей.
У Віцебску атмасфера, падобная да мітынгаў у папярэдніх гарадах: людзей шмат, ёсць нацыянальная сімволіка. Выступаюць музыканты на разагрэве.
Вядучы са сцэны просіць людзей карыстацца мабільным тэлефонам па-мінімуму, бо мабільная сувязь у раёне мітынгу працуе з перабоямі.
Рускамоўная «Стены рухнут» гучыць з дынамікаў.
У 19:30 Ціханоўская, Калеснікава і Цапкала выйшлі на сцэну.
«Света, Света», — амаль ужо фірменнае прывітанне гучыць і ў Віцебску.
Ціханоўскую ашаламіла колькасць людзей, якія прыйшлі яе падтрымаць. Яна спытала ў задніх радоў: «Вы мяне добра чуеце?»
Яна пачала сваю прамову з расказам пра свайго мужа, Сяргея Ціханоўскага.
У параўнанні з папярэднімі выступамі, Ціханоўская ўжо больш імправізуе і ідзе на кантакт з грамадзянамі. «Верым, можам, пераможам», — заводзіць кандыдатка натоўп.
Ціханоўская звярнула ўвагу на цяжкае становішча палітвязняў.
«Свабоду, свабоду», — крычаць людзі.
Ціханоўская кажа пра важнасць аб'яднання апазіцыйных штабоў, каб можна было правесці сумленныя выбары ў будучыні, дзе лёс Беларусі вырашаць яе грамадзяне.
Ціханоўская шмат разоў паўтарае, што яна не палітык і што ў яе ніколі не было такіх планаў.
Людзі асвісталі прозвішча Лукашэнкі, калі Ціханоўская вымавіла яго. Ад людзей там-сям гучаць лозунгі «Стоп таракан!»
«Жыве Беларусь» — патрыятычныя лозунгі таксама лунаюць у паветры.
Пасля слова ўзяла Марыя Калеснікава. Яна нагадала жыхарам Віцебска пра Віктара Бабарыку, які вярнуў на радзіму карціны Марка Шагала — знакамітага ўраджэнца Віцебска.
«Верым, можам, пераможам» — перарывае натоўп выступ Калеснікавай.
«Не бойцеся, нас большасць», — падбадзёрвае Калеснікава людзей і заклікае прыйсці на выбары менавіта 9 жніўня.
Далей на сцэну выйшла Вераніка Цапкала.
«Я бачу тут БЧБ-сцяг, бачу тут сцягі партый, пра які падзел кажуць улады? Мы адзіныя», — кажа Цапкала.
«Вы калі-небудзь чулі пра Майдан ад Бабарыкі, Цапкалы, Ціханоўскага? Не! Пра Майдан казаў толькі цяперашні кіраўнік дзяржавы», — кажа Цапкала.
Цапкала таксама заклікала прыходзіць на выбары менавіта 9 жніўня, а таксама пагаварыць са сваімі сваякамі.
Прадстаўнік аб'яднанага штаба зноў заклікала насіць грамадзян белыя бранзалеты.
«Любім, можам, пераможам», — у такой інтэрпрэтацыі гучыць папулярны апазіцыйны лозунг ад вядучага. Людзі ахвотна яго падхопліваюць.
Пасля выступу Веранікі Цапкала вядучы распавёў пра ініцыятывы «Сумленных людзей», у тым ліку пра праект «Голас».
Выступіла таксама Вольга Кавалькова. Яна была адзінай, хто выступаў выключна па-беларуску. Кавалькова заклікала Лукашэнку пакінуць прэзідэнцкую пасаду, аддаць уладу «мудрым, інтэлігентным жанчынам».
Герой Беларусі Марына Васілеўская нарадзіла дачку ад касманаўта Алега Навіцкага16
Каментары