Сын Канаплёва стаў уласнікам бара ў цэнтры Мінска
А таксама зрабіў рэбрэндынг іншай сваёй установы.
Нядаўна малодшы сын старшыні Беларускай федэрацыі гандбола, віцэ-прэзідэнта Нацыянальнага алімпійскага каітэта Дзяніс Канаплёў набыў папулярны бар, размешчаны ў самым цэнтры сталіцы — насупраць Кастрычніцкай плошчы, — City-cafe Boulevard.
Установа працуе ў ранейшым рэжыме. Адміністратар пацвердзіла, што новым уласнікам з'яўляецца Дзяніс Канаплёў. Акрамя таго, як паведамілі некалькі прадстаўнікоў персаналу, там ужо бываў і сам Уладзімір Канаплёў.
Як высветлілася, малодшы сын віцэ-прэзідэнта НАКа таксама з'яўляецца уладальнікам вядомага Pub Club Mixx, размешчанага на рагу праспекта Машэрава і вуліцы Чырвонай.
Цягам апошніх месяцаў піўны рэстаран быў зачынены: перажываў рэбрэндынг. Крыху больш за тыдзень таму ён зноў запрацаваў у новым фармаце і пад назвай Wine&whiskey bar Mixx.
12 кастрычніка запланавана яго афіцыйнае адкрыццё, на якое, як сказала адміністратар, трапяць толькі запрошаныя кіраўніцтвам госці.
Пагутарыць з Дзянісам Канаплёвым асабіста, каб даведацца аб « цане пытання» новай здзелкі і не толькі не ўдалося. Праз пасярэдніка ён перадаў катэгарычную адмову ад інтэрв'ю.
«Я перадала яму вашу просьбу. Але гэта немагчыма. Дзяніс Уладзіміравіч непублічны чалавек, і нікому і ніколі інтэрв'ю не дае, — сказала арт-дырэктар Wine&whiskey bar Mixx Аляксандра.
Адказваючы на пытанні пра дзве ўстановы, яна адзначыла, што меню прапануе наведвальнікам еўрапейскую і аўтарскую кухню.
Шэф-кухар — адзін на дзве ўстановы. Таксама вядома, што Дзяніс Канаплёў будуе рэстаран, які будзе знаходзіцца на беразе Свіслачы (паміж Нямігай і забаўляльным цэнтрам «Журавінка»).
Ні пацвердзіць, ні абвергнуць гэтую інфармацыю, з-за адмовы рэстаратара ад інтэрв'ю, не ўдалося.
Праўда, ускосна тое, што праект існуе, пацвердзіла суразмоўца: «Вядуцца пачатковыя будаўнічыя працы. Аб канцэпцыі рэстарана пакуль казаць рана».
Цяпер чытаюць
Спевака з «Марафону адзінства» асудзілі за палітыку — прыгадалі каментары 2020-га. Бараніць у суд яго хадзілі сёстры Груздзевы15
Каментары