У ноч на 30 ліпеня Расія нанесла масіраваны ракетна-дронавы ўдар па Украіне. У пасёлку Радушнае Днепрапятроўскай вобласці ў выніку траплення ракеты загінула шматдзетная сям'я. Паводле папярэдніх звестак, расійскія войскі для гэтага ўдару маглі выкарыстаць балістычную ракету паўночнакарэйскай вытворчасці.
Прэзідэнт Украіны Уладзімір Зяленскі заявіў, што папярэднія даныя сведчаць пра выкарыстанне расіянамі ракеты з КНДР.
«Па Радушным расіяне выкарысталі ўпершыню за доўгі час ракету з Паўночнай Карэі — такія папярэднія даныя. Вядома, яшчэ будуць экспертызы, усё будзе правярацца, але па стане на гэты момант — гэта паўночнакарэйская балістыка. Саюз маскоўскіх мярзотнікаў са звар’яцелым рэжымам у Паўночнай Карэі дзеля ракет, дзеля паўночнакарэйскага кантынгенту тут, у Еўропе, на нашых межах, і дзеля забойства нашых украінскіх дзяцей», — сказаў Зяленскі.
У выніку ўдару ў Радушным загінулі як мінімум шэсць членаў адной шматдзетнай сям'і. Пры гэтым некалькі чалавек па-ранейшаму лічацца зніклымі без вестак, таму колькасць ахвяр можа павялічыцца. У Крывым Рогу і Дняпры 31 ліпеня абвешчаны днём жалобы па загінулых.
Падчас масіраванай атакі ў ноч на 30 ліпеня расійскія войскі запусцілі па Украіне чатыры супрацькарабельныя ракеты «Цыркон» або «Анікс», дзевяць балістычных ракет «Іскандэр-М», С-400 або KN-23, 61 крылатую ракету Х-101 і «Калібр», а таксама 284 ударныя беспілотнікі.
Украінская супрацьпаветраная абарона знішчыла або нейтралізавала адну балістычную ракету, 54 крылатыя ракеты і 265 дронаў. Аднак былі зафіксаваныя траплянні трох супрацькарабельных, шасці балістычных і дзвюх крылатых ракет, а таксама 17 ударных беспілотнікаў у 20 месцах.
У выніку атакі загінулыя ёсць у Кіеве, Палтаўскай і Днепрапятроўскай абласцях, сярод ахвяр — дзеці.
Масіраваны ўдар таксама закрануў Львоў. Там былі разбураныя жылыя дамы, загінуў чалавек, яшчэ 34 атрымалі раненні. У Жытомірскай вобласці ракета трапіла ў адно з сельскагаспадарчых прадпрыемстваў Корасценскага раёна. Пашкоджана каля 300 будынкаў, шэсць чалавек параненыя.
У Івана-Франкоўскай вобласці пашкоджаны прамысловы аб'ект, больш за 50 прыватных дамоў і дзевяць гаспадарчых пабудоў. Паведамленняў пра пацярпелых там не паступала.
Каментары