U noč na 30 lipienia Rasija naniesła masiravany rakietna-dronavy ŭdar pa Ukrainie. U pasiołku Radušnaje Dnieprapiatroŭskaj vobłaści ŭ vyniku trapleńnia rakiety zahinuła šmatdzietnaja siamja. Pavodle papiarednich źviestak, rasijskija vojski dla hetaha ŭdaru mahli vykarystać balistyčnuju rakietu paŭnočnakarejskaj vytvorčaści.
Prezident Ukrainy Uładzimir Zialenski zajaviŭ, što papiarednija danyja śviedčać pra vykarystańnie rasijanami rakiety z KNDR.
«Pa Radušnym rasijanie vykarystali ŭpieršyniu za doŭhi čas rakietu z Paŭnočnaj Karei — takija papiarednija danyja. Viadoma, jašče buduć ekśpiertyzy, usio budzie praviaracca, ale pa stanie na hety momant — heta paŭnočnakarejskaja balistyka. Sajuz maskoŭskich miarzotnikaŭ sa zvarjaciełym režymam u Paŭnočnaj Karei dziela rakiet, dziela paŭnočnakarejskaha kantynhientu tut, u Jeŭropie, na našych miežach, i dziela zabojstva našych ukrainskich dziaciej», — skazaŭ Zialenski.
U vyniku ŭdaru ŭ Radušnym zahinuli jak minimum šeść členaŭ adnoj šmatdzietnaj siamji. Pry hetym niekalki čałaviek pa-raniejšamu ličacca źnikłymi bieź viestak, tamu kolkaść achviar moža pavialičycca. U Kryvym Rohu i Dniapry 31 lipienia abvieščany dniom žałoby pa zahinułych.
Padčas masiravanaj ataki ŭ noč na 30 lipienia rasijskija vojski zapuścili pa Ukrainie čatyry supraćkarabielnyja rakiety «Cyrkon» abo «Aniks», dzieviać balistyčnych rakiet «Iskander-M», S-400 abo KN-23, 61 kryłatuju rakietu Ch-101 i «Kalibr», a taksama 284 udarnyja bieśpiłotniki.
Ukrainskaja supraćpavietranaja abarona źniščyła abo niejtralizavała adnu balistyčnuju rakietu, 54 kryłatyja rakiety i 265 dronaŭ. Adnak byli zafiksavanyja traplańni troch supraćkarabielnych, šaści balistyčnych i dźviuch kryłatych rakiet, a taksama 17 udarnych bieśpiłotnikaŭ u 20 miescach.
U vyniku ataki zahinułyja jość u Kijevie, Pałtaŭskaj i Dnieprapiatroŭskaj abłaściach, siarod achviar — dzieci.
Masiravany ŭdar taksama zakranuŭ Lvoŭ. Tam byli razburanyja žyłyja damy, zahinuŭ čałaviek, jašče 34 atrymali ranieńni. U Žytomirskaj vobłaści rakieta trapiła ŭ adno ź sielskahaspadarčych pradpryjemstvaŭ Koraścienskaha rajona. Paškodžana kala 300 budynkaŭ, šeść čałaviek paranienyja.
U Ivana-Frankoŭskaj vobłaści paškodžany pramysłovy abjekt, bolš za 50 pryvatnych damoŭ i dzieviać haspadarčych pabudoŭ. Paviedamleńniaŭ pra paciarpiełych tam nie pastupała.
U harach Kyrhyzstana z drona adšukali cieły źnikłych biełaruskich alpinistaŭ8
Kamientary