Kali mašyna pachnie blinami

Ci škodzić ruchaviku bijadyzielnaje paliva?

2010 hod — apošni dla vykanańnia Dziaržaŭnaj prahramy pa zabieśpiačeńni vytvorčaści dyzielnaha bijapaliva ŭ Biełarusi na 2007—2010 hady. Zhodna z prajektam, uvieś abjom dyzpaliva ŭ krainie musić pradavacca z 5‑pracentavym dadatkam rapsu. Efiekt — aščadžeńnie 300 tysiač ton nafty štohod.

Na ciapier u Minsku ŭsiaho 10 z 79 zapravak majuć asobnuju kałonku ź bijadyzielnym palivam. Adkryvać novyja pakul nie dazvalaje popyt: uładalniki novych darahich inšamarak nie ryzykujuć zalivać padazronaje «BP» u svaje baki.

Biełaruskaje bijapaliva — heta 95% tradycyjnaj salarki i 5% mietyłavych efiraŭ tłuščavych kisłot rapsavaha aleju. Takaja sumieś całkam adpaviadaje narmatyŭnym patrabavańniam da paliva, jakija vystaŭlajucca ŭ krainach ES. Siarod plusaŭ takoha alejnaha dadatku nazyvajuć źmianšeńnie kolkaści škodnych vykidaŭ u atmaśfieru, lepšuju šmarovačnuju zdolnaść rapsavaha paliva.

U ES naohuł niama čystaj salarki, tam usio dyzielnaje paliva idzie z takim 5‑pracentavym dadatkam. A voś bijapalivam na Zachadzie nazyvajuć 100‑pracentavy zamieńnik — vielmi dobra ačyščany rapsavy alej chałodnaha vycisku. Tamu, nabyvajučy dyzielnaje aŭto, nie varta bajacca markiroŭki «nie ekspłuatavać na bijadyzieli» (no biodiesel) — havorka idzie mienavita pra 100‑pracentnaje bijapaliva.

Pradstaŭniki aficyjnych imparcioraŭ zachodnich aŭto kažuć, što na papiery ŭsio sychodzicca, i biełaruskaje paliva zalivać u mašyny možna. Takoha mierkavańnia prytrymlivajucca pradstaŭniki «Sitrajena», «Reno», «Piežo», «Folksvahiena», «Mazdy»… Ale ŭ pryvatnych razmovach jany kažuć, što svaje aŭto bijapalivam nie zapraŭlali b. Maŭlaŭ, ciažka adsačyć, ci dakładna vytrymlivajecca technałahičny praces jaho vyrabu i zachoŭvańnia. Naprykład, zachoŭvać bijadyziel možna nie bolej za try miesiacy — paśla arhaničnyja rečyvy, jakija ŭ im utrymlivajucca, pačynajuć raskładacca, źmianiajučy chimičny skład paliva. A heta, u svaju čarhu, naškodzić mašynie.

Taksama ŭ šerahu prablemaŭ, jakija zhadvajuć aŭtamabilisty, što zalivali navinku, — źnižeńnie mahutnaści matora, bolšy raschod paliva i paskorany znos filtraŭ. Ramont darahoj mašyny kaštuje bolš za ŭjaŭnaje aščadžeńnie na kožnym litry dyziela.

Hałoŭnaja ž pieravaha bijapaliva — jano tannaje. Praz prezidencki ŭkaz akcyzy na jaho źmienšanyja. U jakaści bonusa — z vychłapnoj truby pačynaje pachnuć blinami. U vioskach za traktarami biažyć čarada katoŭ i sabak, jakich pryvablivaje vodar.

Ceny na AZS Biełarusi

Dyzielnaje paliva — 2 580 rubloŭ

Bijadyzielnaje paliva — 2 220 rubloŭ

• 0
• 0
• 0
• 0
• 0
• 0
• 0
• 0