Novaja madel Anthropic vymusiła hłavu Minfina ZŠA pravieści ekstrannuju naradu z kiraŭnikami najbujniejšych bankaŭ

Pavodle źviestak krynic, znajomych ź situacyjaj, u ekstranaj sustrečy ź ministram finansaŭ ZŠA Skotam Biesentam i staršynioj Fiederalnaj reziervovaj sistemy Džejem Paŭełam uziali ŭdzieł kiraŭniki viadučych amierykanskich bankaŭ: Bank of America, Citigroup, Goldman Sachs, Morgan Stanley i Wells Fargo. Top-mieniedžary ŭžo znachodzilisia ŭ Vašynhtonie na mierapryjemstvie bankaŭskaj łabisckaj hrupy. Hienieralny dyrektar JPMorgan Chase Džejmi Dajmand taksama atrymaŭ zaprašeńnie, ale nie zmoh prysutničać.

Nahodaj dla sustrečy stała hłybokaja zaniepakojenaść administracyi Trampa mahčymaściami novaj madeli štučnaha intelektu ad kampanii Anthropic. Hetaja sistema, jakaja atrymała nazvu Claude Mythos Preview, prademanstravała vyklučnyja zdolnaści ŭ vyjaŭleńni ŭraźlivaściaŭ u śfiery kibierbiaśpieki, jakimi mohuć skarystacca złamyśniki dla napadaŭ na finansavuju sistemu.

Claude Mythos Preview była pradstaŭlena 7 krasavika abmiežavanamu kołu partnioraŭ, siarod jakich Amazon, Apple i Microsoft. Heta było zroblena, kab dać im «mahčymaść zahadzia padrychtavacca da likvidacyi ŭraźlivaściaŭ».

Mythos źjaŭlajecca madellu «ahulnaha pryznačeńnia», mahčymaści jakoj vychodziać za miežy kibierbiaśpieki. Heta pieršy vypadak, kali Anthropic śviadoma abmiežavała maštab zapusku novaha praduktu. U aficyjnaj zajavie kampanija adznačyła, što sučasnyja madeli ŠI dasiahnuli takoha ŭzroŭniu ŭ prahramavańni, što ŭ pošuku i vykarystańni ŭraźlivaściaŭ jany zdolnyja pierasiahnuć «amal luboha čałavieka, akramia samych vysokakvalifikavanych śpiecyjalistaŭ».

Pavodle źviestak raspracoŭščykaŭ, Mythos užo vyjaviła tysiačy surjoznych chibaŭ, u tym liku ŭ «kožnaj bujnoj apieracyjnaj sistemie i veb-braŭziery». Niekatoryja ź ich zastavalisia niezaŭvažanymi dziesiacihodździami.

Anthropic paćvierdziła, što viadzie kansultacyi z uradam ZŠA adnosna nastupalnych i abarončych mahčymaściaŭ svajoj sistemy. Pry hetym, jak adznačaje FT, abmiežavany reliz adbyŭsia na fonie dvuch incydentaŭ z uciečkaj ułasnych danych Anthropic, uklučajučy zychodny kod pamočnika Claude, što vyklikała pytańni da ŭłasnaj biaśpieki kampanii. Kampanija patłumačyła hetyja zdareńni čałaviečym faktaram.

Na hety momant Anthropic, FRS i bolšaść bankaŭ, jakija ŭdzielničali ŭ sustrečy, admovilisia ad aficyjnych kamientaroŭ. Ministerstva finansaŭ ZŠA i Citibank taksama nie adkazali na zapyty ŚMI.

FT zaŭvažaje, što bankaŭskija top-mieniedžary ŭžo nie pieršy hod papiaredžvajuć pra kibierryzyki dla finansavaj sistemy. U svaim štohadovym liście, apublikavanym na hetym tydni, hienieralny dyrektar JPMorgan Chase adznačyŭ, što heta «zastajecca adnoj z našych najbolšych pahroz», a «ŠI amal napeŭna pahoršyć situacyju», što zapatrabuje značnych inviestycyj u abaronienaść.

• 9
• 1
• 3
• 1
• 1
• 0
• 1
• 0