Žančyny ad pryrody nieprystasavanyja naradžać na śpinie, ale hety sposab rodaŭ staŭ standartnym, kab było zručna mužčynam
Viakami žančyny naradžali na kaleniach, na kukiškach, karystalisia śpiecyjalnymi kresłami. U hetych pozach naradžać dapamahaje fizijałohija i siła ciažaru. Čamu ž sučasnaja miedycyna pieraviała hety praces u haryzantalnuju płoskaść?
Daśledčyki adznačajuć, što rody ležačy — źjava adnosna novaja. Jana raspaŭsiudziłasia tolki apošnija 300—400 hadoŭ. Jak tłumačyć Bi-Bi-Si, karani hetaj źjavy viaduć da rašeńnia adnaho francuza, jaki paličyŭ, što taki sposab budzie bolš zručnym — dla mužčyn.
Pieršym papularyzavać takuju praktyku staŭ francuzski lekar Fransua Maryso. U svajoj knizie 1668 hoda jon raiŭ prymać rody ŭ łožku, śćviardžajučy, što heta zručniej i dazvalaje paźbiehnuć dadatkovych niazručnaściaŭ. Maryso razhladaŭ ciažarnaść jak stan, blizki da chvaroby.
Isnuje i inšaja viersija: na źmienu pozy moh paŭpłyvać karol Francyi Ludovik XIV. Pavodle niekatorych daśledavańniaŭ, manarch lubiŭ nazirać za momantam naradžeńnia. Adnak viertykalnyja pastavy i tradycyjnyja radavyja kresły zasłaniali jamu ahlad. Kab zadavolić karaleŭskuju cikaŭnaść, pazicyju žančyny źmianili na paŭležačuju.
Pakolki pavodziny samaŭładcaŭ kapijavali atačeńnie i hramadstva — jak ciapier Łukašenkavy zachapleńni chakiejem i drovami, — niazručnaja pastava dla rodaŭ pastupova stała normaj, choć, jak adznačajuć daśledčyki, nivodzin inšy bijałahičny vid u taki krytyčny momant nie lažyć.
Što kaža navuka
Sučasnaja navuka adnaznačna na baku viertykalnych rodaŭ. Pazicyja na kukiškach pavialičvaje dyjamietr taza prynamsi na 2,5 santymietry. Akramia taho, siła ciažaru pracuje na maci, a nie suprać jaje. Kali žančyna lažyć na śpinie, ciažkaja matka ściskaje aortu, što moža pahoršyć kryvaciok i zabieśpiačeńnie dziciaci kisłarodam. Kali ž žančynie dazvolić ruchacca svabodna, jana instynktyŭna nachilajecca napierad, šukajučy aporu na ruki ci kaleni.
Ahlad 25 daśledavańniaŭ z udziełam bolš za 5200 žančyn pakazaŭ, što rody ŭ viertykalnych i ruchomych pozach źnižajuć ryzyku kiesaravaha siačeńnia, patrabujuć mienš abiazbolvańnia (naprykład, epiduralnaj aniestezii) i pamianšajuć kolkaść vypadkaŭ, kali niemaŭlatam patrabujecca intensiŭnaja terapija.
Taksama adznačajecca, što rody ŭ takich pozach zvyčajna karaciejšyja pa časie, a schvatki — bolš efiektyŭnyja. Heta taksama źnižajecca imaviernaść prymianieńnia ščypcoŭ abo praviadzieńnia epizijatamii (razrezaŭ).
Adzinaja zaściaroha tyčycca hrup vysokaj ryzyki: niekatoryja danyja pakazvajuć na mahčymaść bolšaj straty kryvi ŭ viertykalnaj pazicyi, tamu ŭ takich vypadkach patrabujecca pilny nahlad.
Važnaje značeńnie maje i asiarodździe. Daśledavańnie 2011 hoda pakazała, što ŭ radzilnych centrach, dzie jość miačy, kresły i inšyja dapamožnyja srodki, 82% žančyn vybirajuć viertykalnyja pozy. U zvyčajnych balnicach, dzie hałoŭnym elemientam źjaŭlajecca łožak, tolki 25% žančyn naradžajuć u takich pazicyjach.
Siońnia situacyja pastupova mianiajecca. Naprykład, brytanskija dziaržaŭnyja rekamiendacyi (NICE) ciapier rajać daktaram adhavorvać žančyn ad pazicyi ležačy na śpinie padčas patuh i zaachvočvać lubuju inšuju pozu, jakuju maci ličyć zručnaj.
Adnak, jak ličać ekśpierty, dla poŭnaj pieramieny patrebna nie tolki miedycynskaja reforma, ale i aśvieta. Papularnaja kultura — kino i telebačańnie — usio jašče tranślujuć vobraz žančyny ŭ rodach jak pasiŭnaha pacyjenta, prykavanaha da manitoraŭ. Viedy ab tym, što rody — heta aktyŭny praces, dajuć žančynam siłu i prava vybirać toje, što padkazvaje im ułasnaje cieła.
Kamientary