Na ŭčastku doktarki-patołahaanatama ŭ Polščy znajšli pareštki 32 nienarodžanych dziaciej
U polskim pasiołku Lutoryž, kala horada Žešaŭ, pravaachoŭniki vyjavili žudasnuju znachodku. Na pryvatnym učastku, jaki naležyć 57‑hadovaj doktarcy-patołahaanatamu, byli znojdzieny zakapanymi pareštki 32 čałaviečych pładoŭ. Pra heta paviedamlaje RMF24.
Doktarka ŭziataja pad vartu. Padčas dopytu jana pryznałasia, što zakopvała płady samastojna. Infarmacyi ab tym, što joj niechta dapamahaŭ, u śledstva pakul niama.
Palicyjanty razam sa śpiecyjalna navučanym na pošuk sabakam praciahvajuć pierakopvać terytoryju siadziby. Na hety momant aficyjna paćvierdžana znachodka 32 pładoŭ, jakija byli schavanyja pad ziamloj na roznaj hłybini.
Akramia pareštkaŭ, na dvary znajšli vialikuju kolkaść miedycynskich adkidaŭ, uklučajučy škło dla mikraskopaŭ i frahmienty źniščanaj balničnaj dakumientacyi.
Pavodle nieaficyjnaj infarmacyi, sama doktarka tłumačyć svaje dziejańni navukovymi metami. Jana śćviardžaje, što padčas pandemii COVID-19 nibyta zabirała materyjał z balnic, dzie pracavała, kab pravodzić miedycynskija daśledavańni doma.
Śledstva zaraz znachodzicca na rańnim etapie i praviaraje niekalki viersij zdareńnia. U tym liku prakuratura zapytała dakumienty z usich miedycynskich ustanoŭ, dzie była pracaŭładkavana padazravanaja.
Prakurory asobna padkreślili, što na dadzieny momant niama nijakich dokazaŭ taho, što lekarka pravodziła nielehalnyja aborty. Usie znojdzienyja pareštki adpraŭleny ŭ morh dla ekśpiertyzy. Śpiecyjalisty pavinny vyznačyć, kolki času jany znachodzilisia pad ziamloj i adkul mienavita trapili na pryvatny ŭčastak.
Žančyna ŭziataja pad vartu. Pakul joj pradjaŭleny abvinavačańni ŭ ździeku z pareštkaŭ (znachodžańni ich pa-za miescami pachavańnia) i niezakonnym zachoŭvańni niebiaśpiečnych miedycynskich adkidaŭ.
Ciapier čytajuć
«Ja nie praduhledzieła tolki adnaho: što mienavita hety kružočak vykarystajuć suprać mianie». Spoviedź Aliny Charysavaj paśla skandału z KDB45
«Ja nie praduhledzieła tolki adnaho: što mienavita hety kružočak vykarystajuć suprać mianie». Spoviedź Aliny Charysavaj paśla skandału z KDB
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia1515
Kamientary