На ўчастку доктаркі-патолагаанатама ў Польшчы знайшлі парэшткі 32 ненароджаных дзяцей
У польскім пасёлку Люторыж, каля горада Жэшаў, праваахоўнікі выявілі жудасную знаходку. На прыватным участку, які належыць 57‑гадовай доктарцы-патолагаанатаму, былі знойдзены закапанымі парэшткі 32 чалавечых пладоў. Пра гэта паведамляе RMF24.
Доктарка ўзятая пад варту. Падчас допыту яна прызналася, што закопвала плады самастойна. Інфармацыі аб тым, што ёй нехта дапамагаў, у следства пакуль няма.
Паліцыянты разам са спецыяльна навучаным на пошук сабакам працягваюць перакопваць тэрыторыю сядзібы. На гэты момант афіцыйна пацверджана знаходка 32 пладоў, якія былі схаваныя пад зямлёй на рознай глыбіні.
Акрамя парэшткаў, на двары знайшлі вялікую колькасць медыцынскіх адкідаў, уключаючы шкло для мікраскопаў і фрагменты знішчанай бальнічнай дакументацыі.
Паводле неафіцыйнай інфармацыі, сама доктарка тлумачыць свае дзеянні навуковымі мэтамі. Яна сцвярджае, што падчас пандэміі COVID-19 нібыта забірала матэрыял з бальніц, дзе працавала, каб праводзіць медыцынскія даследаванні дома.
Следства зараз знаходзіцца на раннім этапе і правярае некалькі версій здарэння. У тым ліку пракуратура запытала дакументы з усіх медыцынскіх устаноў, дзе была працаўладкавана падазраваная.
Пракуроры асобна падкрэслілі, што на дадзены момант няма ніякіх доказаў таго, што лекарка праводзіла нелегальныя аборты. Усе знойдзеныя парэшткі адпраўлены ў морг для экспертызы. Спецыялісты павінны вызначыць, колькі часу яны знаходзіліся пад зямлёй і адкуль менавіта трапілі на прыватны ўчастак.
Жанчына ўзятая пад варту. Пакуль ёй прад'яўлены абвінавачанні ў здзеку з парэшткаў (знаходжанні іх па-за месцамі пахавання) і незаконным захоўванні небяспечных медыцынскіх адкідаў.
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку23
Каментары