«Fu, brydota! Dzie kupić?» Biełaruski dyzajnier prydumaŭ zavušnicy ŭ vyhladzie klaščoŭ
Biełaruski dyzajnier Loša Limonaŭ dniami prydumaŭ, mahčyma, samaje pałochajučaje ŭpryhožańnie dla biełarusaŭ, piša Onliner.by.
— Pamiataju, adnojčy ŭbačyŭ klaščoŭ na sabaku: poŭść była ŭsypana imi, niby žemčuham. Vyrašyŭ heta ŭražańnie pieratvaryć u ideju. Klešč nahadaŭ mnie žamčužnuju zavušnicu, jak na karcinie Viermiejera, — raskazaŭ Limonaŭ.
Mahčyma, mienavita zavušnicy-klaščy vyhladajuć nie tak užo i žudasna, asabliva zdalok. Ale dyzajnier pakazaŭ, jak jany mohuć vyhladać, naprykład, u vyhladzie dziasiatkaŭ upryhožańniaŭ na sumcy abo vopratcy.
«U mianie až zazudzieła ŭsio», «I žachliva, i pryhoža adnačasova», «Fu, brydota! Dzie možna kupić?» — prykładna takija kamientary pakidajuć pad rolikam Lošy.
Prychilnikaŭ takoha ugly fashion i sapraŭdy akazałasia niečakana šmat. Chtości navat prapanavaŭ nazvu brenda «klaščovaja» juvielirka — Encephalit. Ale dyzajnier kaža, što, navat niahledziačy na chajp, naładžvać vytvorčaść upryhožańniaŭ pakul nie płanuje, choć nie vyklučaje, što abmiežavanaja kolkaść ekzemplaraŭ pa indyvidualnych zakazach usio ž moža źjavicca.
— Niekatoryja prajekty ja rablu prosta kab pakazać, jak heta moža być, raskručvaju nakidy i idei ŭ ŠI. Časam štučna rablu, kali lohka vyrabić. Siońnia napisała śpiavačka Siuzana, kaža: «Chaču zavušnicy z klaščami». Voś i nie viedaju, što ciapier rabić, — raskazaŭ Limonaŭ u razmovie z žurnalistam Onliner.
Pakul dyzajnier kinuŭ klič dla biełaruskich majstroŭ upryhožańniaŭ na supracoŭnictva — kali heta vy abo chtości z vašych znajomych, napišycie Lošu, mahčyma, razam atrymajecca pieršymi ŭ śviecie pieratvaryć klašča ŭ niešta pryhožaje.
Ciapier čytajuć
Biznesoviec rodam z Babrujska admovicca ad svajho hihanckaha aŭstralijskaha zarobku dziela šancu atrymać $35 miljonaŭ3
Kamientary