Mark Formelle prademanstravaŭ budučyja kalekcyi i znoŭ trapiŭ u skandał
Biełaruski brend Mark Formelle prezientavaŭ 14 červienia budučyja kalekcyi na druhoje paŭhodździe 2026 hoda. Mnohim navinki spadabalisia, ale bieź niepryjemnych momantaŭ nie abyšłosia, piša Blizko.by.
Navinki pakazała błohierka Ksienija Sidarenka ŭ Threads. Uletku ŭ brenda vyjdzie kałabaracyja ź biełaruskim chip-chop vykanaŭcam Mikitam Karabykam, jon ža Nkeeei. U kalekcyi buduć pušystyja kofty i chudzi, štany spartyŭnaha typu i mnohaje inšaje.
Da 1 vieraśnia Mark Formelle vypuścić kalekcyju školnaj formy dla chłopčykaŭ i dziaŭčatak. Biełyja kašuli, džempiery, štany, błuzki, spadnicy, halštuki, kardyhany — usio pa standartach Minadukacyi i Dziaržstandartu.
Uvosień vyjdzie i kałabaracyja z avijakampanijaj Belavia, u jakuju ŭvojduć čatyry kamplekty harnituraŭ spartyŭnaha typu. Mienavita hetaja prezientacyja vyklikała burnaje abmierkavańnie ŭ sietcy. Dla ilustracyi pradstaŭniki brenda ŭziali fatahrafii dyzajnierki Darji Łučankovaj-Lebiedzievaj, jakija jana rabiła dla svajho brenda LSD Clothing.
«ŠI prosta isnuje — nahienieruj što zaŭhodna dla refaŭ, ale navošta varušyć palcam, kali možna prosta ŭziać, tak? Vy tytany ź vielizarnymi mahutnaściami, navošta ž tak niepryhoža?» — paskardziłasia dziaŭčyna na svajoj staroncy.
U kamientarach mnohija padtrymali dyzajnierku:
«Niachaj Belavia pahladzić na «aryhinalnaść».
«Nie razumieju, u ich u płanach raźvićcia zapisana: «Kožny miesiac vykidvać niejki krynž»? Ci jak heta razumieć? Typu čorny pijar — heta taksama pijar, tamu davajcie kožny miesiac vykidvać niejkuju situacyju, jakuju ŭsie buduć abmiarkoŭvać».
«Što ni miesiac, to hańba ad niejkich našych bujnych brendaŭ, mnie cikava, heta takaja kancepcyja — ulapacca ŭ skandały prosta praz toje, što adździeł markietynhu ci jašče chto nie ŭmiejuć rabić svaju pracu».
«Niešta ŭ ich markietynh apošnim časam zusim sumny».
«Ja jašče nie zabyłasia, jak jany nizkim dziaŭčatam skazali ŭ dziciačaj kramie adziavacca. Ni nahoj u hetu kramu bolš!»
Pad publikacyjaj adznačyŭsia i sam brend. Pradstaŭniki Mark Formelle zaŭvažyli, što nie płanavali vydavać tvorčaść Darji za svaju abo kapijavać rečy brenda LSD Clothing. Fatahrafii vykarystoŭvalisia dla pieradačy nastroju maskota brenda, anons jakoha pa pieršapačatkovaj zadumie i płanavaŭsia ŭ miežach kałabaracyi.
Adnak mnohich karystalnikaŭ taki adkaz nie zadavoliŭ, i jany raili Darji źviarnucca da jurystaŭ pa abaronu aŭtarskich pravoŭ.
Taksama ŭvosień vyjdzie kalekcyja dla ŭładalnikaŭ pyšnych formaŭ — Plus size edition. Tudy ŭvojduć niekalki ŭzoraŭ štanoŭ, chudzi i kašuli. Maksimalny pamier vyrabaŭ — 6XL.
Na praciahu kastryčnika i listapada brend vypuścić kałabaracyju ź dziacinstva — kalekcyi pavodle multfilmaŭ «Padaŭ letašni śnieh» i «Płastylinavaja varona». U miežach pracy z «Sajuzmultfilmam» vyjduć nie tolki kamplekty adzieńnia, ale i jołačnyja ŭpryhažeńni z hierojami historyj.
Zaviaršaje prezientacyju navinak kalekcyja Apres-ski (u pierakładzie — «Paśla łyžaŭ»). Heta zbornaja nazva dla ŭsich zabaŭ, adpačynku i śvieckich mierapryjemstvaŭ, jakija adbyvajucca na harnałyžnych kurortach paśla dzionnaha katańnia. U pieradzimovuju kalekcyju ŭvojduć tematyčnyja chudzi, śvitšoty, ucieplenyja štany, futbołki i škarpetki.
Mark Formelle vypuściŭ kalekcyju adzieńnia z traktaram Belarus
Japonski mastak raspracavaŭ prynty dla lnianoj kalekcyi Mark Formelle
Biełaruska nabyła dziciaci džynsy Mark Formelle — a ŭ kišeni znajšła zahadkavuju zapisku z kitajskimi ijerohlifami
Pančochi razładu: Mark Formelle znoŭ apynuŭsia ŭ centry skandału. Što na hety raz zdaryłasia?
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5959
Kamientary
[Zredahavana]