Na byłoha kiraŭnika Homiela Pryvałava zaviali kryminalnuju spravu
Adrazu paśla adstaŭki Pryvałavu pradrakali pavyšeńnie — chadzili razmovy pra toje, što jaho zabiare ŭ Minsk jaho pryjaciel. Ale ŭsie akazałasia inakš, daviedaŭsia «Fłahštok».
Aficyjna pra zatrymańnie i kryminalnuju spravu ničoha nie paviedamlajecca, ale, pa infarmacyi krynicy vydańnia, eks-staršyniu harvykankama abvinavačvajuć u machinacyjach ź pieraprodažam kvater.
Papiarednie, u spravie jość i inšyja fihuranty-čynoŭniki.
Pryvałaŭ znachodziŭsia ŭ homielskim SIZA, ale niadaŭna moh być adpuščany pad padpisku ab niavyjeździe.
Takim čynam, Pryvałaŭ moža paŭtaryć los svajho papiarednika. U 2014 hodzie inšy były staršynia harvykankama Viktar Pilipiec byŭ asudžany na 5 hadoŭ pazbaŭleńnia voli pa spravie ab karupcyi i machinacyjach ź nieruchomaściu. Pilipiec i šerah słužbovych asob byli pryznany vinavatymi ŭ niezakonnym raźmierkavańni i prysvajeńni 24 novych kvater, pabudavanych dla tych, chto mieŭ patrebu. Eks-staršyniu abvinavacili ŭ złoŭžyvańni ŭładaj i słužbovymi paŭnamoctvami, ale svaju vinu jon kateharyčna nie pryznaŭ.
Adrazu paśla adstaŭki Pryvałavu pradrakali pavyšeńnie — siarod miascovych čynoŭnikaŭ chadzili razmovy pra toje, što jaho zabiare ŭ adno ź ministerstvaŭ u Minsk jaho pryjaciel. Ale ŭsio vyjšła naadvarot — zamiest vysokaj pasady eks-čynoŭnik atrymaŭ abvinavačańnie ŭ kryminalnym złačynstvie.
Raźvitvajučysia z Pryvałavym, jaki kiravaŭ Homielem kala troch z pałovaj hadoŭ, staršynia abłvykankama Ivan Krupko «ad siabie asabista i ad usich hamialčan» dziakavaŭ jamu «za pieraŭtvaralnuju dziejnaść, jakuju jon raźvivaŭ u horadzie». Taksama Krupko adznačaŭ, što Pryvałaŭ — «adzin ź niešmatlikich kiraŭnikoŭ, chto asabista vioŭ čat-bot, dziakujučy čamu ŭdavałasia apieratyŭna vyrašać mnohija zvaroty hramadzian».
Kamientary