Taŭnchausy za $435 000 ad dziaržzabudoŭščyka amal raźmiali za paru dzion
U kancy sakavika dziaržzabudoŭščyk «Minskbud» zapuściŭ prodažy taŭnchausaŭ. Jany źjaŭlajucca častkaj pasiołka «Utulny-2», jaki budujecca kala žyłoha kompleksu pad nazvaj «Utulny». Uvieś kvartał farmirujecca ŭ lasnym masivie niedaloka ad Nacyjanalnaj biblijateki. Adzin taŭnchaus acenieny ŭ bolš jak $400 000. Prajšło paru tydniaŭ, i svabodnymi zastalisia tolki 4 varyjanty z 12, piša «Anłajnier».
Kožny taŭnchaus pavodle zadumy ŭjaŭlaje saboj dvuchuzroŭnievy dom płoščaj 206,38 kv. m z terasaj i asabistym učastkam. Na pieršym paviersie sprajektavany piaredni pakoj, abjadnanyja kuchnia i haścinaja-stałovaja, sanvuzieł i mini-kacielnia. Na druhim paviersie raźmiaścili try spalni z harderobnymi i sanvuzłami. Praduhledžany taksama łodžyi, a nad paviercham — chałodnaje haryšča. Uzvodzić pieršy rad taŭnchausaŭ pačali ŭ lutym 2026 hoda. A zdać abiacajuć u śniežni 2026 hoda.
Žyllo zdajecca z čarnavoj adździełkaj. Košt «kvadrata» dla ŭsich achvotnych — 6100 rubloŭ.
Kali apłacić usiu sumu adrazu, to heta 1 258 918 rubloŭ — kala $435 000. Kali skarystacca kredytavańniem, to košt vyraście da 1 311 338 rubloŭ — prykładna $453 000. Jość jašče rasterminoŭka.
Stała viadoma, što svabodnymi zastałosia tolki 4 taŭnchausy z 12. Pra heta paviedamili ŭ telehram-kanale «Minskbud». Pryčym u internecie jość infarmacyja, što bolšuju častku kupili jašče ŭ pieršyja dni prodažaŭ.
— Nie ŭpuścicie mahčymaść: cana pakul raniejšaja! — udakładniaje pradstaŭnik zabudoŭščyka.
Miarkujučy pa renderach, u prodaž pastupiŭ tolki pieršy rad taŭnchausaŭ. A ich u pierśpiektyvie płanujecca pabudavać značna bolš. Žurnalisty patelefanavali ŭ adździeł prodažaŭ — udakładnić, što zastałosia i ci płanujecca padaražańnie:
— U najaŭnaści zastalisia kvatery №2, 3, 4, 5.
— Astatnija, atrymlivajecca, užo kupleny?
— Tak, zabraniravany. Ludzi čakajuć našaha razhladu. U nas dziejničaje sistema razhladu dolščyka. Heta pracedura doŭžycca miesiac. Praź miesiac my ahučym svajo rašeńnie ab zhodzie zaklučyć damovu. Moža być admoŭlena biez tłumačeńnia pryčyn.
— Ci płanujecca padaražańnie?
— Na inšyja taŭnchausy, jakija my budziem prapanoŭvać, budzie farmiravacca inšy košt. Heta zakrytaja infarmacyja, ale jany dakładna buduć daražejšyja. Ahučym ceny, kali vyjdzie dekłaracyja.
A ŭ cełym zabudova ŭ miežach Parnikovaj, Padlesnaj i Anajeva čakajecca hłabalnaja. Akramia 60 taŭnchausaŭ, na terytoryi źjavicca kala 100 sučasnych katedžaŭ, a taksama handlova-administracyjny budynak, parkoŭki, dziciačyja placoŭki, sportzony, placoŭki dla zaniatkaŭ mini-futbołam, valejbołam i tenisam. I heta nie ličačy dvuch šmatpaviarchovikaŭ, adzin ź jakich užo zdadzieny, a druhi raście nie pa dniach, a pa hadzinach.
Ciapier čytajuć
Ci zakryjuć Jeŭropu dla biełarusaŭ? Daradca Cichanoŭskaj raspavioŭ, pra što damoviŭsia ŭ Bierlinie12
Kamientary