Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?

Jak paviedamlajecca, technałohija kryminalistyčnaha vymańnia danych była ŭžytaja ŭ miežach rasśledavańnia padziej u centry ŭtrymańnia mihrantaŭ u horadzie Alvarada, štat Techas. Tam adbylisia biesparadki: udzielniki padryvali piratechniku, niščyli majomaść i čynili akty vandalizmu na terytoryi centra. Usie fihuranty paźniej byli pryznanyja vinavatymi pa niekalkich artykułach.

Heta daloka ad nas, ale na pracesie ŭdzielnikaŭ biesparadkaŭ uvahu pryciahnuli pakazańni śpiecahienta FBR Kłarka Vitchorna.

Pavodle infarmacyi, atrymanaj ad prysutnych na pasiedžańni, ekśpiertyza zmahła adnavić teksty paviedamleńniaŭ z iPhone adnoj ź fihurantak spravy — Linet Šarp. Chacia sam miesiendžar Signal na momant pravierki byŭ vydaleny, frahmienty pierapiski zachavalisia va ŭnutranaj pamiaci iPhone.

Pryčyna ŭ tym, jak apieracyjnaja sistema iOS apracoŭvaje apaviaščeńni. Kali ŭ naładach mesiendžara dazvoleny pieradprahlad paviedamleńniaŭ na zabłakavanym ekranie, iPhone aŭtamatyčna zachoŭvaje hety tekst va ŭnutranaj bazie danych apaviaščeńniaŭ.

Padčas fizičnaha dostupu da telefona śpiecsłužby vykarystali śpiecyjalizavanaje prahramnaje zabieśpiačeńnie, jakoje vypampavała hetuju bazu.

Pry hetym ekśpierty zaŭvažyli važnuju detal: takim čynam zachoŭvajucca tolki ŭvachodnyja paviedamleńni, dla vychodnych push-apaviaščeńni nie stvarajucca.

Asablivuju cikavaść vyklikaje toje, što FBR zmahło adnavić navat tyja paviedamleńni, dla jakich u Signal była ŭklučana funkcyja aŭtamatyčnaha vydaleńnia. 

Jak zaścierahčy siabie?

Pakul nie było precedentaŭ, kab łukašenkaŭskija śpiecsłužby praviarnuli tuju ž apieracyju. Ale voś jak možna prafiłaktyčna abaranicca ad zachoŭvańnia pierapiski ŭ pamiaci push-apaviaščeńniaŭ.

Śpiecyjalisty pa ličbavaj biaśpiecy padkreślivajuć, što hetaja prablema nie źjaŭlajecca chibaj mienavita Signal. Heta vynik fundamientalnaj supiarečnaści pamiž pryvatnaściu prahram i zručnaściu karystalnickaha interfiejsu iOS.

Kab paźbiehnuć takoj situacyi, u Signal praduhledžana śpiecyjalnaja nałada. U mieniu «Apaviaščeńni» možna vybrać, što mienavita budzie adlustroŭvacca na ekranie pry atrymańni paviedamleńnia: imia i tekst, tolki imia adpraŭnika, abo naohuł nie adlustroŭvać ni imia, ni źmiest.

Vybar druhoha ci treciaha varyjantu robić niemahčymym zachavańnie tekstu ŭ bazie apaviaščeńniaŭ pryłady.

U telehramie toje samaje, pa idei, dasiahajecca adklučeńniem opcyi «Pieradprahlad u prahramie».

A dla harantavanaha niezachoŭvańnia možna tatalna vyklučyć «apaviaščeńni».

Vydańnie 404 Media adznačaje, što pravaachoŭnyja orhany ZŠA ŭsio čaściej vykarystoŭvajuć push-apaviaščeńni jak krynicu danych. Heta značyć, što i biełaruskija ci rasijskija śpiecsłužby pasprabujuć dziejničać anałahična.

Ni Apple, ni raspracoŭščyki Signal pakul nie dali kamientaroŭ adnosna hetaj situacyi. 

• 6
• 0
• 1
• 3
• 6
• 0
• 0
• 0