«Nie navodźcie paniku, my ŭsie sumlennyja ludzi». Svajaki źniavolenych nie vierać, što ich pryznali ŭdzielnikami «ekstremisckaha farmavańnia»
Tysiačy ludziej biez daj pryčyny apynulisia pad patencyjnym kryminalnym pieraśledam. I nie razumiejuć za što.
6 krasavika 2026 hoda KDB pryniaŭ rašeńnie ab pryznańni ekstremisckim farmavańniem čata «SIZA №1 Kaladzičy». Heta ŭžo nieisny čat svajakoŭ aryštantaŭ, u jakim abmiarkoŭvalisia pytańni nakont taho, što možna kłaści ŭ pieradaču, a što nielha, jak pravilna adpraŭlać pasyłki i pa jakim hrafiku pracuje SIZA. U pikavy momant u im było kala 1900 čałaviek, ale paśla taho, jak čat pryznali «ekstremisckimi materyjałami», administratary vydalili jaho.
U toje ž «farmavańnie» kadebisty ŭklučyli 10 telehram-čataŭ, 9 vajbier-čataŭ i 3 supołki «Ukantakcie». Usio heta supolnaści svajakoŭ źniavolenych — čat žanočaj kałonii ŭ Homieli, čat mužčynskaj kałonii ŭ Babrujsku i hetak dalej.
U kožnaj hrupie sotni i tysiačy ŭdzielnikaŭ (vajbier-čat mužčynskaj kałonii ŭ Mahilovie — 1400+ čałaviek, vajbier-čat mužčynskaj kałonii ŭ Škłovie — amal 1000 čałaviek, supołka «Ukantakcie» mužčynskaj kałonii ŭ Babrujsku — 3500 čałaviek), ale bolšaść padpisčykaŭ prysutničajuć tam naminalna, nie prajaŭlajučy ŭvohule nijakaj aktyŭnaści ci zadajučy niejkaje pytańnie raz na hod. Ciapier jany ŭsie pad pahrozaj — pry ciapierašniaj pravaprymianialnaj praktycy ich dziejnaść padpadaje pad č. 3 art. 361‑1 Kryminalnaha kodeksa (udzieł u ekstremisckim farmavańni). A heta da 4 hadoŭ chimii ci ad 2 da 6 hadoŭ kałonii.
KDB (naŭmysna ci nieznarok) uskładniŭ situacyju.
Pa-pieršaje, kali adkryvaješ tablicu ekstremisckich farmavańniaŭ, to tam u adpaviednaj jačejcy niama pieraliku kankretnych zabaronienych telehram-čataŭ, tolki ID hetych čataŭ. Naprykład, «telehram-čat ID 542733250» biez anijakaj nazvy. Adpaviedna, udzielnik čata navat nie moža zrazumieć, ci jon u zabaronienaj supołcy, bo ID čata dastupny tolki administrataru.
Pa-druhoje, tablica zroblena tak kryva, što tam spačatku adlustroŭvajecca tolki śpis ID zabaronienych telehram-čataŭ. A kali nacisnuć na jačejku, to pakazvajecca jašče śpis zabaronienych vajbier-čataŭ i supołak «Ukantakcie». Dla zvyčajnaha čałavieka nievidavočna, što hety śpis moža raskryvacca.
U vyniku administratary admaŭlajucca vydalać svaje hrupy i abvinavačvajuć u panicy tych, chto papiaredžvaje pra niebiaśpieku.
«Pavažanaja administracyja. Zabłakujcie hetaha čałavieka, chaj nie navodzić strach. My i tak usie na niervach»», — piša adna žančyna. «Tut u hrupie ludzi pytajucca, što i jak pieradavać, a vy ŭsio nijak nie supakoiciesia!» — dadaje druhaja.
«Chtości štości drennaje pisaŭ? Da čahości zaklikaŭ? Što za ŭkid infarmacyi idzie? Navošta ludziej budaražyć? Nie navodźcie paniku, my ŭsie sumlennyja i narmalnyja ludzi», — praciahvaje treciaja, pierakananaja, što adbyłasia niejkaja pamyłka.
Niekalki supołak — naprykład, vajbier-čat žanočaj kałonii ŭ Homieli ŭžo vydalenyja, ale ŭ astatnich praciahvajecca žyvoje abmierkavańnie.
Kamientary
Nibyta udzielniki inšych "ekstremisckich farmavańniaŭ" nienarmalnyja i niesumlennyja