Šakujučaja strata hoda, tajamničyja źniknieńni, dykpiki i departacyi — asnoŭnyja ludzi i padziei 2025 hoda
«Naša Niva» zhadvaje, chto i što nas natchniała, šakavała, radavała, złavała, rasčaroŭvała ŭ hetym hodzie.
Strata hoda — Mikita Miełkazioraŭ
Biełaruski jutub-błohier raptoŭna pamior uviečary 20 śniežnia. Mikitu Miełkazioravu było 37 hadoŭ. Jon byŭ samym papularnym biełaruskim intervjujeram — na jaho jutub-kanale «Žyćcio-malina» z amal sotniaj tysiač padpisčykaŭ vychodzili hutarki ź biełaruskimi palitykami i sielebryci. Mikita pakazvaŭ: u biełarusaŭ chapaje svaich cikavych asob. I heta tolki adzin ź jaho prajektaŭ. Miełkazioraŭ u emihracyi całkam pierajšoŭ na biełaruskuju movu, pakazvajučy prykład inšym.
Što zdaryłasia z błohieram, pakul nieviadoma. Paviedamlałasia, što ŭviečary 20 śniežnia Mikitu stała drenna. Jon adlažaŭsia, adčuŭ siabie lepš praź niekatory čas. Zatym ustaŭ, pajšoŭ i straciŭ prytomnaść. 30 śniežnia ŭ Varšavie adbyłosia raźvitańnie ź Miełkazioravym.
Sprava hoda — sprava Hajuna
U lutym siłaviki atrymali dostup da bota «Biełaruskaha Hajuna» — manitorynhavaha kanała, kudy biełarusy paviedamlali pra pieramiaščeńnie techniki i pryloty dronaŭ. Spasyłku na čat, kudy pierasyłalisia paviedamleńni z bota, siłaviki znajšli na telefonie zatrymanaj aktyvistki, jakaja praciahły čas chavałasia ŭ Biełarusi. Nieviadoma, kolki infarmacyi im udałosia vypampavać i kolki infarmataraŭ «Hajuna» apaznać. Praz paru dzion prajekt spyniŭ pracu. HUBAZiK tady zajaŭlaŭ, što taki krok nibyta źmiakčyć prysudy ludziam.
Zatrymańni pa «spravie Hajuna» prajšli pa ŭsioj krainie. «Viaśnie» na dadzieny momant viadoma pra 127 čałaviek, jakich uziali pad vartu. Minimum 78 čałaviek užo asudzili pa hetaj spravie.
Praces hoda — vyzvaleńni i departacyi palitviaźniaŭ
Sioleta ŭ vyniku sustreč amierykanskich dypłamataŭ z Łukašenkam (u Minsku pabyvali pasłańniki Trampa Kit Kiełah i Džon Koŭł) na volu vyjšli niekalki partyj palitviaźniaŭ. Pieršuju hrupu vypuścili 21 červienia — siarod ich byli Siarhiej Cichanoŭski i Natalla Dulina. Usich vyvieźli ŭ Litvu. Hetym ža maršrutam 11 vieraśnia vyvieźli 51 palitviaźnia (u hetaj hrupie byli Ihar Łosik, Źmicier Daškievič) — 52‑m pavinien byŭ stać Mikoła Statkievič, ale jon vyłamaŭ dźviery aŭtobusa i viarnuŭsia ŭ Biełaruś.
Apošniuju na hety momant hrupu (123 čałavieki) vyzvalili 13 śniežnia — bolšaść niečakana departavali va Ukrainu (u tym liku Maryju Kaleśnikavu, Viktara Babaryku, Paŭła Sieviarynca, Maksima Znaka, Alaksandra Fiadutu), jašče niekalki čałaviek (razam z Alesiem Bialackim) — u Litvu.
Na Usiebiełaruskim narodnym schodzie Łukašenka zhadaŭ, što amierykancy prasili jaho dazvolić zastacca ludziam u krainie. Jon admoviŭ.
Trahikamiedyja hoda — źnikła bulba
Viasnoj adbyłasia amal niemahčymaje — u Biełarusi zdaryŭsia deficyt bulby. Ludzi masava skardzilisia, što ŭ kramach niemahčyma znajści bulbu tavarnaha vyhladu, a ceny padskočyli. Prapahandysty vinavacili ludziej u nyćci. «Oj, siem rubloŭ». — «Dy choć pa dvaccać, blin. Zadziaŭbli svajoj bulbaj. Žerci i žerci aby, i tolki nyć z hetaj nahody», — dzikim krykam kryčaŭ u efiry Ryhor Azaronak.
Ale ŭłady prablemu ŭ vyniku pryznali. Alaksandr Łukašenka daručyŭ Kamitetu dziaržaŭnaha kantrolu razabracca ź situacyjaj u handlovych sietkach. U kramy adpravili nasiennuju bulbu, kab spravicca z deficytam. Paźniej handlovyja sietki, dzie bulby nie budzie, vyrašyli štrafavać.
Što ŭ Biełarusi skončyłasia bulba, ździviła i Pucina — u Rasii svaju bulbu taksama źjeli i pradavali impartnuju.
Źniknieńni hoda — Anžalika Mielnikava i Anatol Kotaŭ
Hetyja tajamnicy jašče treba budzie raskryć. Śpikierka Kaardynacyjnaj rady Anžalika Mielnikava źnikła ŭ sakaviku. Z rachunka, na jaki prychodzili hrošy dla KR i «Kibierpartyzanaŭ» i da jakoha Mielnikava mieła dostup, vyvieli 150 tysiač jeŭra. Muž i dzieci žančyny ŭ Biełarusi, a dzie jana sama — nieviadoma. Śled Anžaliki hublajecca ŭ Dubai. U niekatorych pieralotach Mielnikavu supravadžaŭ ahient Alaksiej Łabiejeŭ. Žančyna raskazvała siabroŭcy, što źbirajecca ź im ažanicca.
U žniŭni źnik Anatol Kotaŭ. Kaliści jon byŭ pravaj rukoj Paŭła Łatuški, ale jany daŭno razyšlisia. Apošnim časam Kotaŭ pracavaŭ u ivent-ahienctvie Terra Group. Jon prylacieŭ u Stambuł, dabraŭsia da Trabzona i adpłyŭ na pryvatnaj jachcie ŭ Sočy. Bolš pra Kotava nie čuli.
Dykpik hoda — Andrej Stryžak
Skandał razhareŭsia ŭ lipieni — niekalki aktyvistak abvinavacili Andreja Stryžaka, na toj momant kiraŭnika fondu «Bajsoł», u rassyłcy dykpikaŭ biez zhody žančyn na toje. Andrej pryznaŭ, što heta było i nieadnarazova, i skazaŭ, što maje seksualnuju zaležnaść. U vyniku Stryžaku daviałosia pakinuć nie tolki kiraŭničuju pasadu ŭ «Bajsole», ale i naohuł pracu ŭ fondzie.
Miem hoda — buchi Ihar
«Dobry dzień. Mianie zavuć Ihar, i ja buchi idu dadomu», — napisaŭ u Threads viciebčuk i pračnuŭsia znakamitym. Za losam Ihara Varachobava sačyli tysiačy čałaviek. Mužčynu spačuvali, za jaho pieražyvali, jaho asudžali i padtrymlivali, i ŭsio heta ź vielizarnym humaram. Dopis ciapier maje 5 miljonaŭ prahladaŭ.
Paźniej roznyja brendy stali prapanoŭvać Iharu padarunki — i kanapu, i boty, i pižamu. A jon zvolniŭsia z zavoda i znajšoŭ pracu ŭ stalicy.
Salidarnaść hoda — Alaksiej Chlastoŭ u taksi i ekstrannyja zbory na palitviaźniaŭ
Kali śpiavak Alaksiej Chlastoŭ pryznaŭsia, što pracuje ŭ taksi, biełarusy ŭ sacsietkach masava jaho padtrymali. I nie tolki ŭ sacsietkach — mnohija stali pytacca, jak zamović taksi, kab za taboj pryjechaŭ mienavita Chlastoŭ. Śpiavak, jaki trapiŭ u «čornyja śpisy» i nie moža vystupać, pravioŭ strym dla svaich prychilnikaŭ — 20 tysiač čałaviek hladzieła toj efir.
Kali ŭ vieraśni niečakana vyjšła paŭsotnia palitviaźniaŭ, a ŭ śniežni — bolš za 100, biełarusy taksama mabilizavalisia i sabrali im dapamohu chutčej čym za sutki. Dla vieraśnioŭskaj hrupy ŭ vyniku ŭdałosia sabrać 111 tysiač jeŭra, dla śniežańskaj achviaravali 250 tysiač jeŭra.
Viartańnie hoda — Siarhiej Cichanoŭski
Vyzvaleńnie Siarhieja Cichanoŭskaha stała dla ŭsich vialikaj niečakanaściu. Usie dumali, što pretendentaŭ u prezidenty, jak svaich hałoŭnych vorahaŭ, Łukašenka budzie trymać u zakładnikach da apošniaha. Ale ŭ červieni Siarhiej Cichanoŭski apynuŭsia na voli. Jaho ciažka było paznać — błohier pry svaim vysokim roście važyŭ usiaho 79 kiłahramaŭ.
Jaho vyzvaleńnie natchniła biełarusaŭ. Cichanoŭski adrazu viarnuŭsia ŭ miedyjaprastoru i zajaviŭ, što rychtujecca nanieści ŭdar režymu. Jon padtrymaŭ Śviatłanu i skazaŭ, što nie budzie asprečvać jaje lidarstva.
Ale skandały, jakija zdarylisia paśla, prymusili častku publiki rasčaravacca. Naprykład, Cichanoŭski byŭ niezadavoleny, što jamu mała zadanacili. U Ńju-Jorku Cichanoŭski patrabavaŭ ad Śviatłany admianić intervju CNN, kab zastacca na sustrečy z dyjasparaj. Hučnyja zajavy pra ŭdar taksama zastalisia tolki na słovach.
Kancert hoda — Maks Korž
Maks Korž daŭ vialiki kancert u Varšavie na 9 žniŭnia. Na stadyjonie sabrałasia kala 70 tysiač čałaviek — kvitki raskupili za tydzień. Mnohija jechali na kancert ź Biełarusi. Praŭda, pavodziny fanataŭ abmiarkoŭvała paśla ŭsia Varšava. Na kancercie zatrymali 109 čałaviek, siarod ich było 13 hramadzian Biełarusi. Biełarusaŭ zatrymlivali za zachoŭvańnie narkotykaŭ, sprobu pranieści piratechniku i padrobku biletaŭ. Troch biełarusaŭ departavali.
Supadzieńnie ci nie, što kancert vypaŭ na hadavinu vybaraŭ-2020, śpiavak nie tłumačyŭ. Maks Korž ciapier žyvie za miažoj — paśla publičnych pahroz HUBAZiKa jon nie viartajecca ŭ Biełaruś.
Pryziamleńnie hoda — Volha Bondarava
Prarasijskaja danosčyca akazałasia nie takoj užo niedatykalnaj. U sakaviku Volhu Bondaravu pasadzili na 13 sutak. Zatrymali jaje pa «ekstremisckim» artykule. «Niešta pierapościła ci što», — tłumačyŭ muž. Paśla sutak danosčycu adličyli ź Pieduniviersitetu.
Paźniak hoda — repier Paźniaks
Zvyčajny chłopiec z Hrodna zapisaŭ pieśniu pra havajskuju picu i parvaŭ internet. Dźmitryju Paźniaku (psieŭdanim — pazniax) — 21 hod. Jaho treki niečakana sabrali miljon prasłuchoŭvańniaŭ. Samy papularny — «Havajskaja pica». Dźmitryj lubić picu z ananasami — adsiul i nazva. Svaju tvorčaść Dźmitryj usprymaje jak «kamiedyju nazirańniaŭ». Ličyć, što niemałuju rolu ŭ jaho papularnaść syhraŭ dysanans źniešnaści i repu. Paźniej Dźmitryj vypuściŭ z Mejbi Bejbi sumiesny trek «Žabinka-Hrodna».
Tajemnaje viasielle hoda — Maryna Vasileŭskaja i Aleh Navicki
Ni kasmanaŭt, ni kaśmičnaja turystka svajo viasielle nie publičyli. Ale ŭ ŚMI infarmacyja pratačyłasia, a na rukach Maryny Vasileŭskaj i Aleha Navickaha zaŭvažyli parścionki, padobnyja da zaručalnych. Joj 35, jamu 54. Dla abaich heta nie pieršy šlub. Navicki z byłoj žonkaj byŭ u šlubie amal 30 hadoŭ. Ale razyšlisia niepaluboŭna — kasmanaŭt vyhnaŭ žonku zimoj na vulicu, zabraŭ małuju dačku.
Kamientary
Daviedalisia (chto nie viedaŭ), što mnohija viadomyja biełarusy - zvyčajnyja ludzi, sa svaimi niedachopami i pamyłkami. Heta nie źmianiła sutnaść supraćstajańnia z terarystyčnaj dziaržavaj i razumieńnie, dzie praŭda.
Śviet, z dapamohaj Trampa, staŭ horš, bližej da dna, na jakim dziaržava Biełaruś.
Ludzi horš nie stali. Maje subjektyŭnyja apytanki nie pakazvajuć takoje paharšeńnie, jak u apytankach sacyjołahaŭ. Zachoŭvajucca ciopłyja adnosiny da biełaruščyny. Sapraŭdnaja Biełaruś žyvie, pakul cicha, ŭ sercach.