Buchi Ihar ź Viciebska ŭžo nie viedaje, jak adbicca ad padarunkaŭ ad roznych brendaŭ. I ŭžo zvalniajecca z zavoda
Imavierna, biełarusy stamilisia ad depresiŭnych navin svajoj krainy i nie mienš składanych navin suśvietnaj palityki. Tamu vyrašyli chvalavacca za prostaha zavadčanina Ihara, jaki vypiŭ zašmat.
Niekalki dzion tamu Ihar Varachobaŭ ź Viciebsku (jon pracuje na zavodzie) pasiarod nočy zrabiŭ u Threads maksimalna ščyry dopis: «Pryvitańnie. Mianie zavuć Ihar i ja buchi idu dadomu».
Zdavałasia b, heta kranalnaja historyja mahła być pachavanaja pad tysiačami inšych — ale ałharytmy sacsietki vyrašyli, što biełarusy pavinny jaje pabačyć. Za try dni toj dopis nabraŭ bolš za 2,1 miljona prahladaŭ, 106 tysiač łajkaŭ i 4 tysiačy kamientaroŭ.
Ludzi sapraŭdy pačali chvalavacca za chłopca: «Ty dajšoŭ Ihar, usio dobra?», «Ihar, Vas turbujuć sa słužby padtrymki. My vas padtrymlivajem».
Maładyja maci pisali, što zajzdrościać Iharu: «Mianie zavuć Hanna, i ja maci ŭ dekrecie. Ja rada za vas, ale nie ad usiaho serca», — darečy, hety kamientar nabraŭ bolš za 10 tysiač łajkaŭ. Jaje padtrymała i jašče adna kamientatarka: «Anałahičnaja situacyja. Taksama chočacca iści kudy-niebudź dadomu pjanieńkaj, a nie voś hetaje ŭsio».
Inšaja ž žančyna pachvaliłasia: «A ja vyklikała nianiu i taksama Ihar! U paniadziełak!».
A kali mierkavać pa kolkaści žartaŭ, dyk možna śćviardžać, što ŭ Biełarusi kožny druhi — stendapier.
«Ihar, kali sustreniecie majho tatu, jaki taksama išoŭ dadomu buchi ŭ 2010 hodzie — skažycie, što my pierajechali».
«Biełaruskija ajcišniki vypuścili novuju niejrasietku. Jaje nazvali Iihar».
«A ŭjavicie, što budzie, kali pra Ihara daviedajecca Halivud? My atrymajem plejadu novych filmaŭ! «Viečnaje źziańnie čystaha Ihara», «Złavi mianie, kali Ihar», «Ihar: daroha tudy i nazad», «Ušeście Ihara», «Ihar Karybskaha mora», «Maŭčańnie Ihara», «Chroniki Ihara», «Stračany Ihar», «Ihar: pierazahruzka», «Ja — Ihar»».
«Na suśvietnaj biržy ŭžo i akcyi jakoha-niebudź Biełaruskaha bulbianoha fondu zajhrali pa-inšamu».
U tym, što Ihar staŭ papularnym, zapadozryli navat Łarysu Dolinu: «Mnie zdajecca, Dolina zapłaciła Meta, kab tyja vynajšli fienomien Ihara, kab usie zabyli pra fienomien Dolinaj».
Apieratyŭna adreahavali i brendy, jakija taksama pryjšli ŭ kamientary dla viciebčuka. «Ščaślivaj darohi tabie, Ihar!» — napisali z aficyjnaha akaŭntu ahrehatara kvitkoŭ Aviasales Belarus. Ale ž i chłopiec nie razhubiŭsia: «Ja b daŭno adpraviŭsia ŭ vandroŭku, kali b u mianie na rukach byli tannyja avijakvitki».
Pakul Aviasales admoŭčvalisia, u kamientary pryjšła turfirma z Kazachstana i prapanavała Iharu padarožža pa svajoj krainie.
Minski hastrabar «Elemientum» paviedamiŭ, što ŭvodzić promakod «Ihar».
Škoła ispanskaj movy pa tym ža promakodzie prapanoŭvaje dva ŭroki ispanskaj movy ŭ padarunak: «Na ŭroki možna prychodzić buchimi, ale lepš razam ź Iharam».
Nievialikaje pradpryjemstva, jakoje robić kanapy, adznačyłasia: «Siabry! Jašče 280 kiłamietraŭ Iharu da Babrujska i jon u «Divano stajł». Ułasnaja vytvorčaść! Kanapa pa eskizach zamoŭca. Navat pa karcinkach ź Pinteresta. Vaša siła stylu i snu Ihara! Ihar, dziakuj, rodny!»
Sałon spartyŭnych trenažoraŭ SST namiaknuŭ, što na ich biehavych darožkach chadzić bolš biaśpiečna.
Madelnaja škoła Ada models prapanavała zrabić ź Ihara prafiesijnuju madel.
Indyvidualnyja pradprymalniki taksama saryjentavalisia i pačali rekłamavać svaje tavary i pasłuhi. Naprykład, žančyna, jakaja robić aramatyčnyja śviečki, paabiacała ŭsim dać źnižku 5% pa promakodzie «Ihar dajšoŭ».
Jašče adna žančyna, jakaja robić śviečki z butelek, paabiacała padaryć Iharu śviečku. I navat dadała, što hatovaja śpiecyjalna dla jaho zrabić śviečku ź piŭnoj butelki.
Niechta skarystaŭsia situacyjaj i pasprabavaŭ znajści ŭ kamientarach novaha haspadara dla koški i kata.
Ironii situacyi dadaje toje, što jašče sioleta ŭ lutym Ihar pisaŭ: «Dobraje miesca Threads. Nichto mianie nie bačyć i nie čytaje. Možna pisać što zaŭhodna. Nichto nie daviedajecca, jaki ja d*iob». Ciapier u hetaha dopisu amal 12 tysiač łajkaŭ.
Žarty pra Ihara vyjšli daloka za miežy jaho halinki. Karystalniki Threads pačali pisać kamientary pra jaho pad samymi roznymi dopisami.
Naprykład, adna dziaŭčyna zapościła pryhožaje sełfi z podpisam: «Ci ja adna nie razumieju sensu hetaj sacsietki? Moža rastłumačyć chto?». U kamientarach joj adzin chłopiec napisaŭ: «Ihar praśpicca i zaŭtra ŭsio rastłumačyć». Jaho kamientar sabraŭ amal 15 tysiač łajkaŭ — u toj čas, jak dopis pryhažuni ŭsiaho kala 500.
Załatym daždžom na Ihara pasypalisia i padarunki ad brendaŭ. Naprykład, viciebskaja fabryka mebli «Saŭłukoŭ-Mebla» padaryła jamu kanapu dla maci, jakaja chutka budzie śviatkavać jubilej. U kamientarach užo cikavicca, za kolki možna nabyć kanapu, na jakoj pasiadzieŭ Ihar.
Papularnaja biełaruskaja błohierka Kryścina Levina, jakaja robić draŭlanyja sumački z ručnym rośpisam, taksama prapanavała padaryć svaju sumačku mamie Ihara.
A «Biełviest» adznačyŭ, što ŭ adnoj ź ich viciebskich kram Ihara čakajuć ciopłyja boty ŭ padarunak.
«Mark Farmel» abiacaje padaryć Iharu svaju pižamu, kali ich dopis naźbiraje 10 tysiač łajkaŭ — praŭda, pakul tam tolki 4,5 tysiačy.
Kafe «Haraž» prapanavała chłopcu pryjści da ich na biaspłatnuju salanku.
Vizavaja kampanija napisała, što dapamoža Iharu i jaho maci adkryć vizy ŭ Jeŭropu.
Biełaruski brend juvielirnych vyrabaŭ Ego-Art prapanavaŭ Iharu zamianić staryja załatyja ŭpryhožvańni na novyja.
Zacikaviłasia zavadčaninam ź Viciebska i błohierka Hanna Bond: «Cikava, a ci jość u Ihara žonka? Kali nie, ja b zaprasiła jaho da siabie, ja jakraz padłohu pamyła». Paźniej jana sapraŭdy paklikała Ihara (jaki niežanaty) da siabie ŭ hości ŭ Drazdy. Ale dziela spraviadlivaści, u chłopca ciapier nie mienš žorstki kastynh, čym na «Mis Biełaruś».
Tym časam Ihar zapuściŭ druhi siezon sieryjału pra svajo žyćcio — napisaŭ u Threads, što zachvareŭ. Ciapier ludzi chvalujucca praz heta i rajać jamu svaje varyjanty lačeńnia.
Za niekalki dzion Ihar sabraŭ 9 tysiač padpisčykaŭ u Threads.
A z zavoda jon sabraŭsia zvalniacca — kaža, adbudziecca heta ŭ paniadziełak.
«Nie chaču čuć «śpierdalaj da Ukrainy» tolki tamu, što razmaŭlaju z baćkami pa telefonie na ruskaj». Biełarusy dzielacca, čamu viartajucca z Polščy133133
Kamientary
Alie ž, na prykładzie pahaloŭja ŭ paru dsiasiatkaŭ tysiač niejkaj abahulniajučaj vysnovy nia zrobiš...
"Chodit duračok po lesu, iŝiet duračok hłupieje siebia..."