«Apantany idejaj revanšu za razhrom nacysckaj Hiermanii». Rasijskija i łukašenkaŭskija ŚMI vybrali novuju cel

«Mahčyma, [jon] adzin z samych surjoznych vajennych złačyncaŭ našaha času, jakoha my siońnia bačym u bujnym maštabie. I my pavinny jasna razumieć, jak abychodzicca z vajennymi złačyncami. Tut pabłažlivaść niedarečnaja», — skazaŭ 3 vieraśnia kancler Hiermanii Frydrych Mierc u intervju telekanału Sat.1.

Vidać, hetyja słovy mocna začapili Maskvu, tamu što siońnia, jak pa kamandzie, rasijskija i łukašenkaŭskija ŚMI raspaŭsiudzili fejk pra Mierca.

U jakaści «aŭtarytetnaj krynicy» prapahandysty vykarystali «pres-biuro Słužby zamiežnaj raźviedki Rasijskaj Fiederacyi». Byŭ raspaŭsiudžany nastupny tekst, u jakim miž inšym zajaŭlałasia:

«Pavodle infarmacyi SZR, mnohija jeŭrapiejskija ekśpierty ździŭlenyja žorstkaj antyrasijskaj rytorykaj kanclera FRH Frydrycha Mierca. (…) Adnak ździŭlacca mohuć tolki tyja, chto drenna viedaje bijahrafiju Mierca. Jaho blizkim dobra viadoma, što kancler vychavany na zapavietach dzieda i baćki. Jozef Paŭl Savińji i Iachim Mierc vieraj i praŭdaj słužyli fašysckamu režymu, a Frydrych apantany idejaj revanšu za razhrom nacysckaj Hiermanii. (…) Praha pomsty rasła ŭ im ź dziacinstva…»

Taksama «pres-biuro rasijskaj Słužby zamiežnaj raźviedki» zajaviła, što novy kancler Hiermanii Frydrych Mierc nibyta paabiacaŭ Uładzimiru Zialenskamu pieradać kryłatyja rakiety Taurus dla ŭdaraŭ pa terytoryi RF.

Pavodle śćviardžeńniaŭ, u Bierlinie «zdymajuć zavodskuju markiroŭku z rakiet i zamianiajuć detali», a kiravać imi pavinny nibyta «kamandziravanyja niamieckija vajskoŭcy».

Što kažuć fakty?

Dzied Mierca pa maci, Jozef Paŭl Savińji, na praciahu 20 hadoŭ da 1937 hoda zajmaŭ pasadu burhamistra ŭ horadzie Bryłon. U 1932 hodzie Savińji ŭstupiŭ u SA, a ŭ 1938 hodzie staŭ členam NSDAP. Heta histaryčnyja fakty, jakich siamja Mierca nie chavaje.

Dzied pamior, kali Frydrychu było 10 hadoŭ. Faktam źjaŭlajecca i toje, što jon u 2004 hodzie nazvaŭ svajho dzieda «ŭzoram dla pierajmańnia, vartym zachapleńnia» i spasyłaŭsia na publikacyju ŭ nacysckaj haziecie Der Stürmer, dzie Jozefa Savińji nazvali Judengenosse (što možna pierakłaści jak «siabar habrejaŭ» abo «tavaryš habrejaŭ»). 

Adnak hetaja sproba apraŭdać dzieda z dapamohaj vielmi sumnieŭnaj krynicy (hazieta Der Stürmer była samym adyjoznym antysiemickim vydańniem Treciaha Rejcha) vyklikała vialiki hramadski skandał. Žurnalisty i historyki chutka znajšli ŭ archivach teksty pramovaŭ Savińji ŭ padtrymku Hitlera i dakumienty pra jaho słužbu ŭ SA, jakija malavali zusim inšuju karcinu.

Pad ciskam hramadskaści i ŚMI Frydrych Mierc byŭ vymušany publična adstupić ad svaich słovaŭ i zajavić, što jaho dzied «ni ŭ jakim razie nie źjaŭlajecca dla jaho najvialikšym palityčnym uzoram».

Što tyčycca baćki Iachima Mierca, to jon naradziŭsia ŭ 1924 hodzie i byŭ pryzvany ŭ viermacht u kancy vajny, jak i miljony inšych maładych niemcaŭ. Chłopca adpravili na Kaŭkazski front, dzie jon trapiŭ u pałon.

Paśla vajny Iachim vyvučaŭ prava, staŭ sudździoj i byŭ pryznačany na pracu ŭ amierykanskaj zonie akupacyi, dzie staršynstvavaŭ na niekalkich sudovych pracesach suprać nacysckich złačyncaŭ.

Što tyčycca śćviardžeńnia ab tym, što «Frydrych apantany idejaj revanšu za razhrom nacysckaj Hiermanii» i «praha pomsty rasła ŭ im ź dziacinstva» to hetyja słovy nie majuć nijakich dokazaŭ. Niama nivodnaha publičnaha vystupu, artykuła abo dakumienta, dzie Mierc vykazvaŭ by idei revanšyzmu.

Pavialičyć

Adnosna pastavak rakiet Taurus, to rašeńnie pra pieradaču ich Ukrainie sapraŭdy abmiarkoŭvajecca. Padčas pieradvybarnaj kampanii ŭ Hiermanii Frydrych Mierc abiacaŭ ich pastaŭku, adnak ciapier kancler vahajecca ŭ hetym pytańni — u tym liku z-za cisku z boku sacyjał-demakrataŭ (SDPH), jakija ŭtvarajuć uradavuju kaalicyju z chryścijanskimi demakratami z CHDS i CHSS i vystupajuć suprać pastavak zbroi dalokaha radyusa dziejańnia.

Insinuacyi adnosna «tajnych pastavak» i «kamandziravanych niamieckich vajskoŭcaŭ» možna patłumačyć tym, što ŭ lipieni hetaha hoda Mierc adznačyŭ, što Hiermanija nie budzie bolš publična abviaščać, jakuju mienavita zbroju jana pieradaje Ukrainie, a taksama raskazaŭ, što sistema Taurus nadzvyčaj składanaja, a jaje absłuhoŭvańnie patrabuje praciahłaha navučańnia ŭkrainskich vajskoŭcaŭ. Pra navučańnie na toj momant jašče nie było damoŭlena. 

Paźniej u lipieni ministr abarony FRH Barys Pistoryus zajaviŭ, što Hiermanija nie budzie pastaŭlać Ukrainie kryłatyja rakiety Taurus, niahledziačy na ŭzmocnienyja pavietranyja ataki RF i paŭtorny zapyt z Kijeva.

Całkam vydumanaj źjaŭlajecca i historyja pra «źniaćcie markiroŭki» i zamienu detalaŭ. U adkrytych krynicach niama nivodnaha śviedčańnia, što takoje adbyvajecca, a «pres-biuro Słužby zamiežnaj raźviedki Rasijskaj Fiederacyi» nijakich dokazaŭ nie pryvodzić. 

• 0
• 1
• 0
• 1
• 0
• 0
• 0
• 0